Ta'kidlanganidek, 23 iyul kuni Prezidentimiz Hisob palatasining faoliyati hamda ijro tizimini takomillashtirish chora-tadbirlariga oid taqdimoti bilan tanishdi. Endilikda Hisob palatasi faqat nazorat qiluvchi emas, balki byudjet intizomiga ko‘maklashuvchi va xulosa beruvchi idoraga aylangani aytib o‘tildi. Shu bois asosiy e'tibor moliyaviy intizom buzilishining oldini olish (profilaktika), buning omillarini tahlil qilishga qaratilmoqda.

Hisob palatasi faoliyati byudjet intizomini kuchaytirish, xarajatlar samaradorligini oshirish maqsadida byudjet intizomi buzilishini barvaqt oldini olishga qaratildi.

Mamlakatimiz iqtisodiyoti izchil o‘sib bormoqda. Shunga mutanosib ravishda davlat xarajatlari so‘nggi 8 yil davomida 6 barobarga oshgan. Bu, o‘z navbatida, moliyaviy nazorat ko‘lami va ish hajmini ham oshiradi. Buni qamrab olishning samarali yo‘li – raqamlashtirish. 

Shuning uchun, Hisob palatasida raqamli transformasiya jarayonlariga xalqaro standartlar asosida ustuvor e'tibor qaratilmoqda. 

2025 yilning I yarim yilligida 38 ta audit tadbirlari o‘tkazildi. Shundan, 23 tasi joyiga chiqqan holda va 15 tasi masofaviy tahlil qilindi.

Byudjet xarajatlari mablag‘larini iqtisod qilish, maqbullashtirish va qo‘shimcha daromadlarni aniqlash maqsadida Hisob palatasi, Iqtisodiyot va moliya vazirligi, Bosh prokuratura huzuridagi Departament o‘rtasida qo‘shma qaror qabul qilindi. Tuzilgan Ishchi guruhlar tomonidan byudjetdan mablag‘ oluvchi 22 ta vazirlik va idoralarda amaliy ishlar hozirda olib borilmoqda.

Audit natijalari bo‘yicha ishlab chiqilgan taklif va tavsiyalar Prezident Administratsiyasiga kiritib borildi.

Byudjet xarajatlarining samaradorligi va qonuniyligini ta'minlash hamda tushumlar to‘liqligi ustidan nazorat ishlari Hisob palatasi tomonidan bundan keyin ham davom ettiriladi.