Tanlov audit, ma’lumotlar tahlili (Data Analytics), IT va Big Data yo‘nalishlari bo‘yicha o‘tkazilmoqda. Nomzodlardan budjet xarajatlari va moliyaviy hisobotlarni tahlil qilish, xatarlarni aniqlash, katta hajmdagi ma’lumotlar bilan ishlash, Python, SQL va ETL/ELT kabi texnologiyalarni qo‘llash bo‘yicha tegishli kasbiy bilim va tajriba talab etildi.

Shuningdek, nomzodlar o‘z kasbiy salohiyatini faqat rezyume bilan emas, balki bajargan ishlari va amalga oshirilgan loyihalari orqali ham tasdiqlashlari lozim edi.

Taqdim etilgan arizalar e’lon qilingan talablarga muvofiqligi bo‘yicha dastlabki o‘rganishdan so‘ng, belgilangan mezonlarga javob beradigan nomzodlar suhbat bosqichiga o‘tmoqda.

Keyingi bosqichda nomzodlarning kasbiy bilimlari, tahliliy fikrlashi va o‘z yo‘nalishiga oid vazifalarni hal etishdagi amaliy yondashuvi baholanadi.

Davlat auditida ma’lumotlar tahlili, raqamli vositalar va xatarlarga asoslangan yondashuvlar tobora keng qo‘llanilayotgan sharoitda ushbu yo‘nalishlarda faoliyat yuritadigan mutaxassislarning kasbiy salohiyati alohida ahamiyat kasb etadi.

Hisob palatasida tanlov jarayoni e’lon qilingan talablar va belgilangan bosqichlar asosida davom ettiriladi.