Mazkur tadbir ikki mamlakat Oliy audit organlari o‘rtasida imzolangan Hamkorlik memorandumi doirasida amalga oshirilayotgan ishlarning davomi bo‘lib, davlat auditi sohasida tajriba almashish va hamkorlikni yangi bosqichga olib chiqishga qaratildi.

Uchrashuv davomida tomonlar ijtimoiy ahamiyatga ega bo‘lgan sohalarda qo‘shma va parallel audit tadbirlarini tashkil etish, audit jarayonlarida qo‘llaniladigan yondashuvlar va metodologiyalar hamda audit natijalarining samaradorligini oshirishga doir masalalarni muhokama qildilar.

Ozarbayjonlik hamkorlar tomonidan 2026-yil sentabr oyida ilk parallel audit tadbirlarini o‘tkazish bo‘yicha takliflar bildirildi. Tomonlar mazkur tashabbuslarni amalga oshirish mexanizmlari, hamkorlikning tashkiliy-huquqiy jihatlari hamda audit mavzularini shakllantirish bo‘yicha fikr almashdilar.

Ta’kidlanganidek, parallel auditlar davlat mablag‘laridan samarali foydalanilishini baholash, audit faoliyatining ta’sirchanligini oshirish hamda oliy audit organlari o‘rtasida ilg‘or tajribalar almashish uchun muhim maydon hisoblanadi.

Uchrashuv yakunida ikki mamlakat Oliy audit organlari o‘rtasidagi amaliy hamkorlikni yanada kengaytirish, qo‘shma tashabbuslarni izchil davom ettirish hamda davlat auditi sohasida xalqaro standartlar va ilg‘or amaliyotlarni joriy etish bo‘yicha hamkorlikni mustahkamlash yuzasidan kelishuvlarga erishildi.