Suhbat davomida davlat moliyasini boshqarish, audit sohasida ilg‘or xalqaro tajribalarni joriy etish hamda Hisob palatasi xodimlarining kasbiy malakasini oshirish masalalari muhokama qilindi.

Uchrashuvda Hisob palatasi va ACCA o‘rtasidagi hamkorlikni rivojlantirish istiqbollari yuzasidan fikr almashildi. Tomonlar auditorlik sohasidagi xalqaro tajribalarni amaliyotga joriy etish, malaka va salohiyatni oshirish bo‘yicha qo‘shma tashabbuslarni ishlab chiqish zarurligini ta'kidladi.

Ma'lumot uchun: ACCA (Association of Chartered Certified Accountants) — jahondagi eng nufuzli xalqaro buxgalterlik va auditorlik tashkilotlaridan biri bo‘lib, 180 dan ortiq mamlakatlarda faoliyat yuritadi. ACCA xalqaro standartlar, moliyaviy hisobdorlik va auditorlar malakasini oshirish bo‘yicha ilg‘or bilimlarni tadbiq etishni o‘z oldiga maqsad qilgan.

Muhokamalar davomida Hisob palatasi va ACCA o‘rtasida Hamkorlik to‘g‘risidagi Memorandumni imzolash masalasi qayd etildi. Ushbu hujjat orqali tomonlar auditorlik sohasida bilim va tajriba almashish, o‘quv-seminarlar tashkil etish hamda xodimlar kasbiy salohiyatini oshirishga qaratilgan qo‘shma loyihalarni amalga oshirishni rejalashtirgan.

Shuningdek, uchrashuvda ACCA tomonidan quyidagi takliflar bildirildi:

– Hisob palatasi xodimlarini texnik vebinarlarga taklif etish orqali ilg‘or xalqaro tendensiyalar bilan tanishtirish;

– Davlat auditorlarini sertifikatlash tizimini qo‘llab-quvvatlash, shu jumladan, mazkur yo‘nalishda o‘quv dasturini ishlab chiqishda texnik va metodologik yordam ko‘rsatish;

–  Hisob palatasi bilan hamkorlikda maqsadli mavzularda qo‘shma konferensiyalar tashkil etish;

– Hisob palatasi xodimlari uchun ACCA o‘quv platformasida qo‘shimcha imkoniyatlarni yaratish orqali ularning kasbiy bilim va malakasini oshirishni qo‘llab-quvvatlash.

–  Hisob palatasi uchun “ACCA Approved Employer” maqomini olish.

Uchrashuv yakunida tomonlar muhokamalarni amaliy bosqichga olib chiqish, Memorandum loyihasini kelishish va hamkorlikni mustahkamlash bo‘yicha ishlar boshlanganini ma'lum qildi.