Mazkur sessiya O‘zbekiston Respublikasi Prezidentining davlat auditi va moliyaviy nazorat tizimini takomillashtirishga oid farmon va topshiriqlari ijrosi doirasida tashkil etilgan bo‘lib, u davlat auditi sohasida sun’iy intellekt va raqamli texnologiyalarni joriy etish bo‘yicha xalqaro tajriba almashishga qaratilgan.

Birinchi parallel sessiya “Axborot texnologiyalari auditi: raqamli muhitda axborot tizimlarini baholash, risklarni boshqarish va nazorat mexanizmlari” mavzusiga bag‘ishlandi. Sessiya doirasida axborot texnologiyalari auditining zamonaviy yondashuvlari, raqamli infratuzilmalarni baholash, kiberxavfsizlik risklarini aniqlash hamda nazorat tizimlarini takomillashtirish masalalari muhokama qilindi.

Sessiya ishida Hisob palatasi rahbariyati vakillari, Raqamli texnologiyalar vazirligi, Oliy ta’lim, fan va innovatsiyalar vazirligi, Yoshlar ishlari agentligi mas’ullari hamda AZOSAI va INTOSAI xalqaro tashkilotlari vakillari ishtirok etdi. Shuningdek, AZOSAIga a’zo davlatlarning oliy audit organlari yosh auditorlari ham faol qatnashdi.

Muhokamalar davomida davlat auditi sohasida raqamli transformatsiyaning amaliy jihatlari, sun’iy intellekt texnologiyalaridan samarali foydalanish, Big Data tahlili asosida qaror qabul qilish tizimini takomillashtirish masalalariga alohida e’tibor qaratildi.

Sessiya yakunida ishtirokchilar tomonidan bildirilgan taklif va tashabbuslar xalqaro hamkorlikni yanada mustahkamlash, shuningdek, yosh auditorlarning raqamli tahlil ko‘nikmalarini rivojlantirishga xizmat qilishi ta’kidlandi.