Mazkur tadbir Hamdo‘stlikka a’zo Oliy audit organlari o‘rtasidagi professional hamkorlikni mustahkamlash, davlat auditi sohasida ilg‘or tajribalar almashish hamda xalqaro standartlarni qo‘llash bo‘yicha yondashuvlarni muvofiqlashtirishga qaratildi.

Uchrashuv davomida tashqi davlat auditi jarayonlarida so‘rovnomalar o‘tkazish metodologiyalarini takomillashtirish, audit natijalarining ishonchliligi va ta’sirchanligini oshirish, shuningdek, audit faoliyatida sifat nazorati mexanizmlarini kuchaytirish masalalari atroflicha muhokama qilindi.

Xususan, davlat auditining xalqaro standartlari tizimining muhim tarkibiy qismi hisoblangan “Audit sifatini boshqarish standarti” (ISSAI 140)ni amaliyotga joriy etish bo‘yicha ishtirokchi davlatlarning tajribasi va yondashuvlari ko‘rib chiqildi.

Ushbu standartning samarali qo‘llanilishi audit jarayonlarining shaffofligi, xolisligi va natijadorligini ta’minlashda muhim ahamiyat kasb etishi ta’kidlandi.

Qozog‘iston Oliy audit palatasi tomonidan davlat auditorlari motivatsiyasini oshirishga qaratilgan ishlar yuzasidan hisobot berildi.

Rossiya Federatsiyasi Hisob palatasi tomonidan davlat auditi maqsadida so‘rovnoma o‘tkazish metodologiyasi bo‘yicha ma’lumot berildi.

Qirg‘iziston Hisob palatasi esa “Audit sifatini boshqarish standarti”ni joriy etish amaliyoti bo‘yicha taqdimot qildi.

Tadbir ishtirokchilari davlat moliyaviy nazorati tizimini takomillashtirish, audit faoliyatiga zamonaviy usul va mexanizmlarni keng joriy etish hamda Oliy audit organlari o‘rtasida bilim va tajriba almashinuvini yanada faollashtirish masalalari yuzasidan fikr almashdilar.

Uchrashuv yakunida davlat auditi sohasidagi hamkorlikni izchil davom ettirish, xalqaro standartlarni amaliyotga tatbiq etish bo‘yicha tajriba almashishni kengaytirish hamda MDH mamlakatlari Oliy audit organlari o‘rtasidagi institutsional hamkorlikni yanada rivojlantirish muhimligi qayd etildi.

O‘zbekiston Respublikasi Hisob palatasi xalqaro hamkorlik doirasida davlat auditi tizimini takomillashtirish, ilg‘or xalqaro tajribalarni o‘rganish va joriy etish hamda Oliy audit organlari bilan o‘zaro manfaatli aloqalarni mustahkamlashga qaratilgan ishlarni izchil davom ettirmoqda.