Ushbu tadbirda O‘zbekiston Respublikasi Hisob palatasi vakillari ishtirok etdi. Seminar davlat auditi sohasida raqamli transformatsiya jarayonlarini chuqurlashtirish, sunʼiy intellekt va zamonaviy IT-texnologiyalarni audit amaliyotiga joriy etish, shuningdek, Oliy audit organlari o‘rtasida o‘zaro tajriba almashish maqsadida tashkil etilgan.

Tadbir doirasida ishtirokchilar uchun sunʼiy intellekt texnologiyalaridan davlat auditida foydalanish, axborot texnologiyalari sohasida davlat dasturlari auditini amalga oshirish, raqamli transformatsiya samaradorligini baholash hamda audit jarayonlarida innovatsion yondashuvlarni qo‘llashga bag‘ishlangan o‘quv sessiyalari o‘tkazildi.

Shuningdek, seminar ishtirokchilari Belarus Respublikasining Yuqori texnologiyalar parki faoliyati bilan tanishib, raqamli yechimlar, zamonaviy tahlil platformalari hamda innovatsion IT-infratuzilmalarning davlat boshqaruvida qo‘llanilishi bo‘yicha amaliy tajribalarni o‘rgandi. 

Xalqaro seminar davlat auditi sohasida xalqaro hamkorlikni mustahkamlash, raqamli audit bo‘yicha ilg‘or tajribalarni o‘rganish hamda mamlakatimizda davlat moliyaviy nazorati tizimini yana-da takomillashtirishda muhim ahamiyat kasb etadi.

Taʼkidlash lozim, O‘zbekiston Respublikasi Hisob palatasi tomonidan xalqaro tajribalarni o‘rganish, IT-audit va sunʼiy intellekt texnologiyalarini davlat auditiga keng joriy etish bo‘yicha izchil ishlar amalga oshirilmoqda. Bu esa davlat moliyaviy nazorati tizimi samaradorligini oshirish va zamonaviy raqamli audit mexanizmlarini rivojlantirishga xizmat qiladi.