Tashrif doirasida Ozarbayjon delegatsiyasi O‘zbekiston Respublikasi Oliy Majlisi Senati raisi T. Narbayeva bilan uchrashdi.

Uchrashuv davomida ikki davlat Oliy audit organlari o‘rtasidagi hamkorlik izchil rivojlanib borayotgani ta’kidlandi. Qayd etilganidek, Tomonlar o‘rtasida imzolangan Hamkorlik memorandumi mazkur sohadagi aloqalarni yanada mustahkamlash va o‘zaro tajriba almashishni kengaytirishda muhim ahamiyat kasb etmoqda.

Hisob palatalari tomonidan olib borilayotgan o‘rganish va tahlillar parlament faoliyati bilan uzviy bog‘liq ekani, nazorat-tahlil natijalari asosida ta’sirchan parlament nazoratini yo‘lga qo‘yish davlat dasturlarining samarali ijrosini ta’minlashda muhim o‘rin tutishi aytildi.

Shuningdek, tahlil natijalari asosida davlat va hududiy byudjetlarni shakllantirish, yo‘l qo‘yilayotgan kamchiliklarning oldini olish bo‘yicha profilaktik tavsiyalar ishlab chiqish, nazorat tizimlarini raqamlashtirish hamda korrupsiyaning oldini olishga qaratilgan preventiv mexanizmlarni rivojlantirish masalalari yuzasidan fikr almashildi.

Tomonlar kelgusida O‘zbekiston va Ozarbayjon parlamentlari hamda Hisob palatalari o‘rtasidagi hamkorlikni yanada rivojlantirish, o‘zaro tajriba almashishni kengaytirishga kelishib oldi.