Davlatimiz Rahbari tomonidan qabul qilingan PF-100-sonli Farmon bilan mahalliy byudjetlar ijrosi to‘g‘risidagi Hisob palatasining xulosalari, Qoraqalpog‘iston Respublikasi Jo‘qorg‘i Kengesi va xalq deputatlari Kengashlari majlislarida Hisob palatasi mas'ullari ishtirokida muhokama qilinishi belgilangan.

Hisob palatasi tomonidan joriy yilning may-iyun' oylarida Respublikamizning barcha hududlarida Qoraqalpog‘iston Respublikasi Jo‘qorg‘i Kengesi va xalq deputatlari Kengashlari majlislarida tegishli muhokamalar o‘tkazildi.

Jumladan, 2025 yilning 29 may kuni Andijon viloyati Kengashining sessiyasi bo‘lib o‘tdi. 30 mayda Xalq deputatlari Samarqand viloyati Kengashining o‘n uchinchi sessiyasi bo‘lib o‘tdi. 

Shuningdek, 30 may – 12 iyun' kunlari Xalq deputatlari Jizzax, Qashqadaryo viloyatlari va Toshkent shahar Kengashlarining sessiyalarida Hisob palatasi mas'ullari ushbu idoraning mahalliy byudjetlarning 2024 yildagi ijrosi bo‘yicha hisoboti to‘g‘risidagi masalalari bo‘yicha so‘zga chiqdilar.

Mazkur muhokamalar davomida Hisob palatasining ma'sul xodimlari tomonidan mahaliy byudjetlar ijrosi jarayonida yo‘l qo‘yilgan xato va kamchiliklar, hamda ularni bartaraf etish yuzasidan taklif va tavsiyalari tashqi audit xulosasida aks ettirilgani ta'kidlandi.

Shu bilan birga, Davlatimiz Rahbarining Farmoniga muvofiq, 2025 yildan boshlab birinchi darajali byudjet mablag‘larini taqsimlovchilar Davlat byudjeti va davlat maqsadli jamg‘armalari hisobidan hududlarga taqsimlangan mablag‘lar bo‘yicha ma'lumotlarni tegishli xalq deputatlari Kengashlariga taqdim etishi belgilanligi yuzasidan aytib o‘tildi.

Xalq deputatlari Kengashlari tomonidan mahalliy byudjetlarga Davlat byudjeti, Davlat maqsadli jamg‘armalari va Xalqaro moliya institutlari hisobidan ajratilayotgan mablag‘lar bo‘yicha Farmon ijrosi yuzasidan so‘rovlar va nazoratning o‘rnatilishi orqali byudjet mablag‘laridan oqilona, maqsadli hamda samarali foydalanilishi va shaffoflikni kuchaytirilishiga erishiladi.

Sessiyalar ochiq muhokama va konstruktiv fikr almashinuvi shaklida bo‘lib o‘tdi. Har bir masala yuzasidan tegishli qarorlar qabul qilindi.