O‘zbekiston Respublikasi Prezidentining 2024-yil 10-iyuldagi PF-100-son Farmoniga asosan mazkur xulosalar Qoraqalpog‘iston Respublikasi Jo‘qorg‘i Kengesi hamda xalq deputatlari viloyatlar va Toshkent shahar Kengashlari majlislarida Hisob palatasi mas’ul vakillari ishtirokida muhokama qilinishi belgilangan.

Shu munosabat bilan 2025-yilning 27-29-dekabr kunlari Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlarining sessiyalari bo‘lib o‘tdi. Ushbu sessiyalarda Hisob palatasining 2026-yil mahalliy budjet loyihalari yuzasidan tayyorlangan xulosalari muhokama qilinib, ularda belgilangan taklif va tavsiyalar keng jamoatchilik e’tiboriga havola etildi.

Muhokamalar davomida yashirin iqtisodiyot ulushini qisqartirish orqali mahalliy budjetlar daromad bazasini kengaytirish, yuridik shaxslarni sog‘lomlashtirish, qo‘shimcha soliq manbalari va ish o‘rinlarini yaratish imkoniyatlari alohida qayd etildi. Shuningdek, budjet xarajatlarini rejalashtirishda davlat va hududiy dasturlar, ish haqi va unga tenglashtirilgan to‘lovlar, oziq-ovqat hamda kommunal xizmatlar xarajatlarining asosli va mutanosib rejalashtirilishiga e’tibor qaratildi.

Shu bilan birga, O‘zbekiston Respublikasi Prezidentining 2025-yil 18-dekabrdagi “Davlat auditi va moliyaviy nazorati faoliyatini yanada takomillashtirishga doir qo‘shimcha chora-tadbirlar to‘g‘risida”gi 252-son Farmoni mazmun-mohiyati tushuntirildi.

Unga muvofiq, 2026-yil 1-apreldan boshlab 23 ta vazirlik va idoralarda, shuningdek Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarida Hisob palatasining vakili sifatida bosh inspektor faoliyati yo‘lga qo‘yilishi belgilangan.

Mazkur Farmon doirasida budjet qonunchiligi buzilishining oldini olish, tashqi qarz mablag‘lari, investitsiya dasturlari va subsidiyalar hisobidan amalga oshirilayotgan xarajatlarning maqsadli, samarali va tejamkorlik tamoyili asosida sarflanishi ustidan nazoratni kuchaytirish vazifalari belgilandi.

Sessiyalar yakunlariga ko‘ra, Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari tomonidan Hisob palatasi xulosalarida aks etgan tavsiya va ko‘rsatmalar inobatga olinib, 2026-yil uchun Qoraqalpog‘iston Respublikasi budjeti, viloyatlar va Toshkent shahar mahalliy budjetlarini tasdiqlash to‘g‘risida tegishli qarorlar qabul qilindi.