Ma'lumot o‘rnida: Latviya Davlat nazorati – mamlakatning mustaqil, kollegial idorasi bo‘lib, davlat va munisipal byudjet mablag‘lari auditi bilan shug‘ullanadi. Uning maqomi Konstitusiyada belgilangan. 1918 yilda tuzilgan. INTOSAI, YeVROSAI, Iqtisodiy hamkorlik va taraqqiyot tashkiloti kabi tuzilmalarda faol idora hisoblanadi. Yevropa Ittifoqi va NATO kabi nufuzli tashkilotlarning tarkibiy qismlarini ham auditdan o‘tkazadi.

Uchrashuvda Hisob palatasi raisining birinchi o‘rinbosari M. Abdullaev Hisob palatasida hozirda amalga oshirilayotgan tarkibiy islohotlar haqida ma'lumot berdi. Latviyalik mehmonlar Nataliya Mixaylova va Roberts Yumikis, shuningdek, Hisob palatasining Masofaviy nazorat markazi faoliyati bilan yaqindan tanishdi. 

So‘nggi davrda Hisob palatasi o‘z faoliyatini avvalgi moliyaviy tekshirishlardan xalqaro standartlar asosida audit o‘tkazishga qaratib, davlatning professional xulosa beruvchi va baholovchi audit organi sifatida qayta shakllantirilgani ta'kidlandi.

Latviya Davlat nazorati auditorlari tomonidan Hisob palatasi jamoasi uchun “samaradorlik auditi” mavzusida 30-soatli maxsus o‘quv-trening kurslari tashkil qilindi. Unda Hisob palatasining 30 ga yaqin xodimi ishtirok etdi. 

Treningda samaradorlik auditining asosiy xususiyatlari va tamoyillari haqida batafsil ma'lumot berildi. Samaradorlik auditini rejalashtirish, ma'lumotlarni tahlil qilish, xavflarni aniqlash, ularni baholash va dalillarni olishga e'tibor qaratildi. Ichki sifat nazorati, auditorlik xulosasi va hisobotini tayyorlash hamda muvofiqlashtirish yo‘nalishlariga urg‘u berildi.

O‘quv treninglar jonli, interaktiv formatda bo‘lib o‘tdi. 

Tomonlar xalqaro standartlar asosida audit o‘tkazish masalalarida yanada yaqinroq hamkorlik qilish va tajriba almashishga kelishib oldi.