Uchrashuv davomida so‘nggi yillarda Hisob palatasi faoliyatini kuchaytirishga qaratilgan keng ko‘lamli islohotlar haqida ma’lumot berildi. Xususan, keyingi ikki yilda davlat tashqi auditi tizimini takomillashtirish bo‘yicha 4 ta muhim Prezident farmoni qabul qilingani, jumladan, yaqinda qabul qilingan farmonda sun’iy intellekt va raqamlashtirishni keng joriy etishga doir strategik vazifalar belgilangani qayd etildi.

Ta’kidlanganidek, Hisob palatasida raqamli texnologiyalar asosida nazorat tadbirlarini zamonaviy yondashuvlar asosida tashkil etish bo‘yicha tizimli ishlar amalga oshirilmoqda. Bugungi kunda audit jarayonlarini masofaviy shaklda o‘tkazish amaliyoti kengayib, joriy yilning birinchi yarim yilligida auditlarning qariyb 60 foizi masofaviy formatda amalga oshirildi.

Masofaviy nazorat natijalari samaradorligi ham alohida qayd etildi. Xususan, 27,1 trln so‘mlik risklar aniqlanib, ularning 8 trln so‘mi bartaraf etildi hamda 90 mlrd so‘mlik moliyaviy kamchiliklarning oldi olindi. Shuningdek, “Masofaviy audit” axborot tizimida beshta yo‘nalish bo‘yicha sun’iy intellekt texnologiyalari joriy qilinishi natijasida 107 mlrd so‘mlik qonunbuzilish holatlari bartaraf etildi.

Uchrashuvda joriy yilda Qonunchilik palatasida Hisob palatasining yillik hisoboti ko‘rib chiqilib, deputatlar tomonidan bildirilgan taklif va tavsiyalar asosida alohida chora-tadbirlar dasturi qabul qilingani ham ma’lum qilindi. Mazkur dastur qonunchilikni takomillashtirish, pul-kredit siyosati, davlat aktivlarini boshqarish, ichki audit tizimini rivojlantirish hamda raqamlashtirish kabi ustuvor yo‘nalishlarni qamrab olgan.

Tadbir doirasida deputatlarga ushbu yo‘nalishlarda amalga oshirilayotgan ishlar yuzasidan taqdimotlar o‘tkazildi. Shuningdek, Hisob palatasi to‘g‘risidagi qonunga sun’iy intellekt va raqamlashtirishga oid normalarni kiritishni nazarda tutuvchi qonun loyihasi taqdim etildi. Uning mazmun-mohiyati yuzasidan deputatlarning dastlabki fikr va takliflari muhokama qilindi.

Uchrashuv ochiq muloqot ruhida o‘tib, davlat tashqi auditini yanada samarali tashkil etish, raqamli texnologiyalarni keng joriy qilish va parlament bilan konstruktiv hamkorlikni izchil rivojlantirish masalalari yuzasidan o‘zaro fikr almashildi.