Mazkur tadbir O‘zbekiston Respublikasi Hisob palatasi va Ozarbayjon Respublikasi Hisob palatasi o‘rtasidagi amaliy hamkorlikni yanada mustahkamlash, shuningdek, davlat auditi sohasida tajriba almashishni yangi bosqichga olib chiqishga qaratildi.

Seminar-trening davomida davlat xaridlari sohasida tashqi davlat auditini rivojlantirish, ilg‘or xalqaro metodologiyalarni joriy etish hamda raqamli texnologiyalar va zamonaviy axborot yechimlaridan samarali foydalanish masalalari atroflicha muhokama qilindi.

O‘zbekiston tomoni davlat xaridlari tizimini isloh qilish, uning shaffofligini oshirish, raqobat muhitini kuchaytirish va korrupsiyaviy xavflarni kamaytirish ustuvor vazifalardan biri ekanligini alohida ta’kidladi.

Shu bilan birga, Ozarbayjon Respublikasi Hisob palatasining kameral va masofaviy nazoratda axborot manbalaridan samarali foydalanish, sun’iy intellekt va raqamli texnologiyalarni qo‘llash, shuningdek, audit natijalarini baholashda zamonaviy yondashuvlarni tatbiq etish bo‘yicha ilg‘or tajribasi o‘rganildi.

O‘z navbatida, O‘zbekiston Respublikasi Hisob palatasi vakillari davlat xaridlarini audit qilish tizimi, nazorat mexanizmlarini takomillashtirish, xalqaro audit standartlarini amaliyotga joriy etish hamda raqamli transformatsiya va masofaviy nazorat usullarini rivojlantirish bo‘yicha o‘z tajribalari bilan o‘rtoqlashdilar.

Ta’kidlash joizki, seminar-trening davomida tomonlar o‘zaro qiziqtirgan masalalar yuzasidan batafsil fikr almashdilar hamda davlat xaridlari sohasida audit amaliyotiga oid savollarga to‘liq va asosli javoblar olindi. Bu esa ikki tomonlama hamkorlikning nafaqat do‘stona, balki amaliy va metodologik jihatdan ham samarali ekanini yaqqol namoyon etdi.

Eslatib o‘tamiz, O‘zbekiston Respublikasi Hisob palatasi va Ozarbayjon Respublikasi Hisob palatasi o‘rtasida hamkorlik memorandumi joriy yilning mart oyida Ozarbayjon delegatsiyasining O‘zbekistonga tashrifi chog‘ida imzolangan edi.

Seminar-trening yakunida tomonlar davlat xaridlari sohasida auditorlik faoliyati uchun risk mezonlarini muvofiqlashtirish hamda qo‘shma metodik tavsiyalarni ishlab chiqish bo‘yicha kelishuvga erishdilar.