Forumda Oʻzbekiston Respublikasi va Birlashgan Arab Amirliklari hukumatlari, xorijiy davlatlar va xalqaro tashkilotlarning yuqori martabali vakillari, davlat xizmati sohasidagi yetakchi ekspertlar va jamoatchilik faollari qatnashmoqda.

Soʻnggi yillarda respublikamizda byurokratiyani qisqartirishga qaratilgan 9 ta farmon va qaror qabul qilindi. Davlat xizmatlari markazlari, Yagona portal platformasi, “Raqamli hukumat” kabi tizimlarning tashkil etilishi natijasida davlat xizmatlari xalqimiz uchun yanada qulay, tezkor va shaffof boʻlmoqda.

Raqamlashtirish natijasida 30 turdagi xizmatlarni real vaqt rejimida olish imkoniyati yaratildi. Joriy yilning oʻzida 8 millionga yaqin xizmatlar avtomatik ravishda koʻrsatildi. Hujjat almashinuvining elektron shaklga oʻtkazilishi aholining yiliga 23 milliard soʻm mablagʻlari tejalishiga imkon bermoqda.

Ta'kidlanganidek, Yangi Oʻzbekistonda “Qogʻozsiz hukumat” tizimiga toʻliq oʻtilib, qogʻoz aylanmasidan butunlay voz kechiladi. Mavjud 40 million hujjatlardan 25 millioni, shundan keyingi yilning oʻzida 5 millioni raqamlashtiriladi.

Har yili vazirlik va idoralar faoliyati maxsus raqamli platforma orqali baholanadi. Eng yaxshi natijaga erishgan idoralar va xodimlarni ragʻbatlantirish tartibi joriy etiladi.

Ochilish marosimidan soʻng Prezidentimiz forum mavzusi, ilgari surilgan tashabbuslarning ahamiyati haqida jamoatchilik vakillari bilan suhbatlashdi. Yurtimizda “Inson qadri uchun” gʻoyasi barcha islohotlarning asosini tashkil etayotgani, byurokratiyani bartaraf etish zamirida har bir qaror, har bir xizmat, har bir jarayon faqat inson manfaatiga xizmat qilishi zarurligi taʼkidlandi.