Tadbir davomida zamonaviy auditning bosh strategiyasi sifatida Big Data (katta hajmli ma’lumotlar) bilan ishlash, raqamli ekotizimlarni rivojlantirish va sun’iy intellekt (AI) algoritmlarini nazorat jarayonlariga joriy etish masalalari markaziy mavzuga aylandi.

Konferensiyada Qirg‘iziston Hisob palatasi vakillarining chiqishlari ham qatnashchilarda alohida taassurot uyg‘otdi.

Xususan, Qirg‘iziston Hisob palatasi vakillari Aybashov Mirlan hamda Asankanov Bakyt o‘z mamlakatlarida davlat boshqaruvi va audit sohasida qo‘llanilayotgan noyob raqamli yechimlar bilan o‘rtoqlashdilar. Mehmonlar tomonidan taqdim etilgan “Qirg‘iziston Respublikasi davlat auditida raqamli transformatsiya” mavzusidagi ma’ruza ishtirokchilarda katta qiziqish uyg‘otdi.

“Bugungi shiddatli raqamlashish davrida an’anaviy tekshiruv usullari o‘z ahamiyatini yo‘qotmoqda. AI-tahlilga asoslangan masofaviy nazorat nafaqat vaqtni tejaydi, balki korrupsiya xavflarini oldindan prognoz qilishda eng samarali qalqon hisoblanadi,” — deya ta’kidlaydi qirg‘izistonlik mutaxassislar.

Auditorlar O‘zbekistonda davlat auditi tizimini isloh qilish borasida olib borilayotgan izchil siyosatni alohida e’tirof etdilar.

Ta’kidlanishicha, mazkur nufuzli tadbirning yuqori saviyada tashkil etilgani O‘zbekistonning nafaqat mintaqada, balki xalqaro miqyosda ham raqamli audit drayveriga aylanib borayotganidan dalolat beradi.

ASOSAI doirasidagi sheriklikni mustahkamlash, yosh kadrlarning IT-ko‘nikmalarini oshirish va tizimli muammolarni birgalikda tahlil qilish uchun mazkur anjuman beqiyos platforma vazifasini o‘taydi.

So‘zga chiqqan mehmonlar dolzarb mavzularning muhokama qilinishi va xalqaro hamjamiyatning bir nuqtaga jamlangani uchun tashkilotchilarga samimiy minnatdorlik bildirdilar.

O‘zbekistonning raqamli audit yo‘nalishidagi innovatsion tashabbuslari boshqa davlatlar uchun ham namuna sifatida xizmat qilishi alohida e’tirof etildi.