Vebinar avvalida O‘zbekiston Respublikasi Hisob palatasi raisi o‘rinbosari S. Mirzayev O‘zbekiston va Vengriya Oliy audit organlari o‘rtasidagi munosabatlar yuqori darajada ekanligini ta’kidladi. O‘zaro hamkorlik kun tartibidan xodimlarning kasbiy malakasini oshirish masalalari o‘rin olganligi aytib o‘tildi.

Vebinarda “Markaziy budjetni rejalashtirish va ijro etish bilan bog‘liq Vengriya Davlat auditi idorasining vazifalari” mavzusida taqdimot qilindi. Unda Vengriya Davlat auditi idorasining vazifalari, fiskal kengash qarorlarini qabul qilish jarayonini qo‘llab-quvvatlovchi faoliyat hamda byudjet jarayonlarini muntazam monitoring qilish bo‘yicha ma’lumotlar berildi.

So‘ng markaziy budjet to‘g‘risidagi qonun loyihasi bo‘yicha xulosa berish yo‘nalishida muhokamalar bo‘lib o‘tdi. Vengriyalik auditorlar tomonidan 2026-yilgi markaziy budjet loyihasini ko‘rib chiqish dasturi va budjet to‘g‘risidagi qonun loyihasi bo‘yicha asosiy xulosalar taqdim etildi.

Vebinar so‘ngida “Monitoring tahlilidagi modellar” mavzusidagi prezentatsiya namoyish qilindi. Unda yil oxiriga qadar daromadlarning budjet smetasining 100 foiziga yetishi uchun soliq tushumlarini prognoz qilish, shuningdek ish haqi bilan bog‘liq soliqlarning rivojlanishini prognozlovchi model muhokama qilindi.

Vebinarda ko‘tarilgan mavzular o‘z faoliyatini xalqaro standartlarga moslashtirayotgan O‘zbekiston Hisob palatasi uchun muhimligi ta’kidlab o‘tildi.