Yaponiyalik ishtirokchilarning ta’kidlashicha, bu ularning O‘zbekistonga ilk tashrifi bo‘lib, mamlakatdagi ochiqlik, mehmondo‘stlik va zamonaviy islohotlar ularda katta taassurot qoldirgan:

“O‘zbekiston xalqi juda samimiy va mehmondo‘st ekan. Bu yerga yana do‘stlarimiz bilan birga kelishni istardik”, deya qayd etdi delegatsiya a’zolaridan biri.

Konferensiya doirasida Oliy audit organlari o‘rtasidagi hamkorlik, audit sohasida axborot va tajriba almashish, raqamli audit vositalarini joriy etish hamda zamonaviy tahlil usullarini rivojlantirish masalalari muhokama qilindi.

Yaponiyalik mutaxassislar, ayniqsa, O‘zbekistonda sun’iy intellekt va raqamli texnologiyalarni davlat auditi tizimiga joriy etish borasida amalga oshirilayotgan ishlar yuqori darajada ekanini alohida ta’kidladilar.

“O‘zbekistonda sun’iy intellekt texnologiyalari va raqamli yechimlar kutganimizdan ham rivojlangan ekan. Konferensiya juda foydali va amaliy ahamiyatga ega bo‘ldi”, dedi delegatsiya vakili.

Shuningdek, Yaponiya delegatsiyasi a’zolari Hisob palatasining Masofaviy audit markazi faoliyati bilan yaqindan tanishib, mazkur markazda qo‘llanilayotgan innovatsion mexanizmlar va tahlil tizimlariga yuqori baho berdilar.

Ularning fikricha, markazdagi raqamli nazorat va tahlil mexanizmlari davlat auditining samaradorligini oshirishda muhim ahamiyat kasb etadi.

“Masofaviy markazdagi batafsil va innovatsion tizimlar bizda katta qiziqish uyg‘otdi. Bunday yechimlarni Yaponiyada joriy etish muayyan qiyinchiliklarni talab qilishi mumkin, ammo ushbu tajriba biz uchun juda foydali bo‘ldi”, — deyiladi bildirilgan fikrlarda.

Yaponiyalik ekspertlar audit jarayonlarida Big Data, videokuzatuv va raqamli monitoring tizimlaridan keng foydalanish bugungi kunda davlat auditining eng muhim yo‘nalishlaridan biriga aylanayotganini ta’kidladilar.

Ta’kidlash joizki, mazkur xalqaro konferensiya O‘zbekiston Respublikasi Prezidenti tomonidan davlat auditi va moliyaviy nazorat tizimini modernizatsiya qilish bo‘yicha belgilangan vazifalar ijrosi doirasida tashkil etilmoqda.

Tadbirning asosiy maqsadi — davlat auditi sohasida raqamli texnologiyalar, sun’iy intellekt va Big Data asosidagi tahlil mexanizmlarini rivojlantirish, xalqaro tajriba almashish hamda Oliy audit organlari o‘rtasidagi hamkorlikni yanada mustahkamlashdan iborat.