Mazkur tadbir PF-252-son Farmon ijrosini ta’minlash, shuningdek davlat moliyaviy nazoratini tizimli ravishda kuchaytirishga qaratildi.

Seminarda vazirlik rahbariyati hamda tizimga kiruvchi 234 ta tashkilotdan 306 nafardan ortiq mas’ul rahbar va mutaxassislar, jumladan bosh hisobchilar, ichki audit va komplaens xizmatlari vakillari ishtirok etdi.

Tadbir davomida Hisob palatasining vazirlikdagi vakili — Bosh inspektor D. Normatov tomonidan kun tartibidagi masalalar, jumladan Prezident farmonining mazmun-mohiyati, sohada joriy etilayotgan yangi yondashuvlar hamda davlat auditi tizimining ustuvor yo‘nalishlari yuzasidan batafsil ma’lumotlar berildi.

Ta’kidlanganidek, 2026-yil 1-apreldan e’tiboran davlat organlarida Hisob palatasi vakili — bosh inspektor instituti joriy etilgan bo‘lib, ushbu tizim moliyaviy nazoratning samaradorligini oshirishga xizmat qiladi.

Ma’lumot uchun, O‘zbekiston Respublikasining “2026-yil uchun O‘zbekiston Respublikasining Davlat budjeti to‘g‘risida”gi Qonuniga muvofiq O‘zbekiston Respublikasi Maktabgacha va maktab ta’lim vazirligiga ajratiladigan budjet mablag‘lari jami 63,7 trln so‘mni tashkil etib, shundan 54 trln so‘mi (84,8 foiz) ish haqi va unga tenglashtirilgan to‘lovlar hamda ijtimoiy soliqqa, 500 mlrd so‘mi (0,8 foiz) kapital qo‘yilmalarga, shuningdek 9,2 trln so‘mi (14,4 foiz) davlat-xususiy sheriklik asosidagi maktabgacha ta’lim tashkilotlariga subsidiyalar, darsliklar, kompyuter va interaktiv doska, sport inventari hamda boshqa xarajatlarga yo‘naltirilishi rejalashtirilgan.

Shuningdek, zamonaviy raqamli texnologiyalar va doimiy monitoring tizimlari orqali har bir budjet mablag‘i ustidan kuchaytirilgan nazorat o‘rnatilayotgani ta’kidlandi. Bu esa maktabgacha va maktab ta’limi tizimida takror sodir etilayotgan moliyaviy qonunbuzilishlarni barvaqt aniqlash, ularning oldini olish hamda mablag‘larning manzilli va samarali sarflanishini ta’minlashga xizmat qiladi.

Tadbir yakunida ishtirokchilarga moliyaviy intizomni mustahkamlash, qonunbuzilishlarning oldini olish hamda nazorat samaradorligini yanada oshirish bo‘yicha aniq vazifalar belgilab berildi.