Ma'lumot o‘rnida: INTOSAI Taraqqiyot tashabbusi (IDI) Oliy audit organlari xalqaro tashkiloti (INTOSAI) tarkibiga kiruvchi organ hisoblanadi. U asosan rivojlanayotgan mamlakatlarda Oliy audit organlari salohiyatini rivojlantirishni qo‘llab-quvvatlaydi. IDI 1986 yilda Sidney Kongressi davomida tashkil etilgan. Norvegiya Bosh auditori IDI Kengashi raisi vazifasini bajaradi.

Hamkorlikni chuqurlashtirish maqsadida INTOSAI Taraqqiyot tashabbusi Malaka oshirish bo‘limi boshqaruvchisi N. Albanova O‘zbekistonga amaliy tashrif bilan keldi. Hisob palatasida bo‘lib o‘tgan uchrashuvda hamkorlikning joriy holati va istiqbollari muhokama etildi.

Hisob palatasi raisining birinchi o‘rinbosari M. Abdullaev ushbu idorada hozirda amalga oshirilayotgan keng ko‘lamli transformasiyalar haqida so‘z yuritdi. Asosiy e'tibor xalqaro standartlar asosida audit tadbirlarini tashkil qilishga qaratildi.

N. Albanova, o‘z navbatida, Hisob palatasini institusional qo‘llab-quvvatlash, uning faoliyatiga INTOSAI metodologiyalarini joriy qilish masalalariga to‘xtaldi.

“Global hisobdorlik tashabbusi” (GSAI) doirasida O‘zbekiston Respublikasi Hisob palatasiga Gruziya Davlat auditi idorasi (Oliy audit organi) tomonidan texnik va maslahat yordami ko‘rsatilishi aytildi.

Shu bilan birga, O‘zbekiston Respublikasi Hisob palatasi, Gruziya Davlat auditi idorasi va INTOSAI taraqqiyot tashabbusi o‘rtasida GSAI loyihasi bo‘yicha Hamkorlik memorandumini imzolash bo‘yicha muhokamalar amalga oshirilmoqda.