Hisob palatasi tomonidan Situatsion markazlarda amalga oshirilayotgan ishlar yuzasidan taqdimotlar bilan tanishilib, erishilgan natijalar hamda kelgusida rejalashtirilgan vazifalar muhokama qilindi.

Shu bilan birga, masofaviy nazorat tizimi samaradorligini oshirish va jarayonlarni raqamlashtirishga qaratilgan rejalar yuzasidan fikr almashildi.

Undan tashqari, kelgusida tizimda byudjet mablag‘larini maqsadli va samarali ishlatilishi ustidan monitoring va nazorat tizimini o‘rnatish hamda zamonaviy nazorat mexanizmlarini joriy etish yuzasidan vazirlik va idoralar rahbariyati hamda mas’ul xodimlariga Hisob palatasi tomonidan tavsiyalar bildirildi.

Idoralardagi o‘rganishlar natijalari yuzasidan amaliy xulosalar bayon qilinib, quyidagi asosiy yo‘nalishlarga urg‘u bergan holda ishlarni tashkil etish maqsadga muvofiqligi ma’lum qilindi:

- nazorat muhitining yaxlit va barqaror tizimini shakllantirish;

- xavflarni boshqarishning samarali mexanizmlarini joriy etish;

- nazorat jarayonlari natijadorligini oshirish;

- axborot-kommunikatsiya tizimlarini takomillashtirish va raqamli yechimlarni keng joriy etish.

Raqamli maydonda xavflarni kamaytirish, ma’lumotlar xavfsizligi va konfidensiallikni ta’minlash, zamonaviy axborot texnologiyalari orqali shaffoflikni kuchaytirish masalalari yuzasidan fikr almashildi.

Qayd etish joizki, ushbu chora-tadbirlar davlat organlarida nazorat muhitini mustahkamlash, xavflarni barvaqt aniqlash va bartaraf etish, byudjet mablag‘laridan oqilona hamda samarali foydalanishni ta’minlashga xizmat qiladi.