Ma'lumot uchun: Tijorat banklarining aktivlari 2025 yilning 1 avgust holatiga 852,4 trln so‘mni tashkil qilib, 553,1 trln so‘mi (65%) davlat ulushi mavjud 9 ta banklarga hamda 299,2 trln so‘mi (35%) boshqa banklarga to‘g‘ri keladi. Tijorat banklarining kredit portfeli 576,2 trln so‘mni tashkil qilib, shundan 392,5 trln so‘m qismi (68%) davlat ulushi mavjud banklarga to‘g‘ri keladi. Joriy yilning o‘tgan 7 oyi mobaynida Banklarning aktivlari 83,1 trln so‘mga (+10,8%), kredit portfeli 43,1 trln so‘mga (+8%) oshgan.

Audit davomida banklar tomonidan muammoli kreditlarni undirishda ayrim kamchiliklarga yo‘l qo‘yilganligi aniqlandi. Masalan:

– Davlat ulushi mavjud banklarda muammoli kreditlar joriy yilning 7 oyi mobaynida O‘zsanoatqurilishbankda, Mikrokreditbankda, Milliybankda, Aloqabankda hamda Asakabankda oshgan;

– joriy yilning 1 avgust holatiga davlat ulushi mavjud banklar kredit portfelida muammoli kreditlarning eng yuqori ulushi Mikrokreditbankda 

6,5 foizni, Biznesni rivojlantirish bankida 6,1 foizni va Asakabankda 

4,8 foizni tashkil qilgan;

– muammoli kreditlarning bir qismi so‘ndirilmagan holda, bank xarajati hisobiga balansdan tashqari hisobvaraqlarga olib o‘tish orqali salmog‘i qisqartirilgan;

– joriy yilning 1 avgust holatiga 6 ta davlat ulushi mavjud tijorat banklari tomonidan kreditlar bo‘yicha ehtimoliy yo‘qotishlarni qoplash uchun yetarli zaxiralar shakllantirilmagan;

– manfaatlar to‘ynashuviga yo‘l qo‘yish holatlari mavjud bo‘lib, bank xodimlariga aloqador shaxslarga tegishli kreditlar bo‘yicha muddati o‘tgan qarzdorliklar yuzaga kelgan;

– qarz oluvchining ish joyi va daromad manbai mavjud bo‘lsa-da, muammoli yoki balansdan tashqari kreditlarini undirish borasida yetarli ishlar tashkil qilinmagan.

Audit natijalaridan kelib chiqib, muammoli kreditlarni qisqartirishda banklar faoliyati samaradorligini yanada oshirish yuzasidan Hisob palatasining tegishli tavsiyalari taqdim qilindi.