Mazkur o‘quv-seminarlar davlat organlari va tashkilotlarida yangi joriy qilingan Hisob palatasining vakili sifatida faoliyat yurituvchi Bosh inspektorlarning kasbiy salohiyatini oshirish, ularning vazifa va vakolatlarini chuqur anglashini ta'minlashga qaratildi.

Seminarlar davomida ishtirokchilarga Farmonda belgilangan ustuvor vazifalar, xususan:

- byudjet mablag‘laridan samarali va maqsadli foydalanish ustidan nazoratni kuchaytirish; 

- qonunbuzilish holatlarining oldini olish va profilaktika choralarini tashkil etish; 

- davlat xaridlari, investisiya loyihalari hamda infratuzilma ob'ektlari ustidan monitoring olib borish; 

- xavf-xatarlarni baholash va tahlil qilish mexanizmlarini joriy etish yo‘nalishlarida atroflicha tushunchalar berildi. 

Shuningdek, bosh inspektorlarning asosiy vazifalari, ularning hisobdorligi hamda “Davlat auditi” dasturiy kompleksida ishlash ko‘nikmalari bo‘yicha amaliy mashg‘ulotlar o‘tkazildi. 

O‘quv-seminarlarda zamonaviy yondashuvlar, jumladan, davlat auditi jarayonlarini raqamlashtirish, sun'iy intellekt texnologiyalarini qo‘llash va masofaviy audit imkoniyatlaridan samarali foydalanish masalalariga alohida e'tibor qaratildi.

Ushbu tadbirlar Bosh inspektorlar faoliyatini samarali tashkil etish, davlat organlari va tashkilotlarida byudjet intizomini mustahkamlash hamda davlat moliyaviy nazorati tizimini yangi bosqichga olib chiqish maqsadiga xizmat qiladi.