Respublika bo‘yicha 2023–2025 yillarda 4,5 mln ta avtotransport vositalari texnik ko‘rikdan o‘tkazilgan, qayta jihozlangan avtotransport vositalari soni 937,3 mingtani tashkil etgan.

Sohada ko‘rsatilgan xizmatlarni raqamlashtirish hamda vakolatli idoralar o‘rtasida elektron ma’lumot almashinuvi yo‘lga qo‘yilishida tizimli kamchiliklar mavjudligi tahlil qilindi. Jumladan:

– YHXX axborot tizimi va soliq idoralari ma’lumotlar bazalari o‘zaro integratsiya qilinmagani sababli sohada xizmatlar hisobi to‘laqonli yo‘lga qo‘yilmagan;

– texnik ko‘rik o‘tkazish huquqini beruvchi malaka guvohnomalarining amal qilish muddatiga rioya etilishi raqamlashtirilmagan;

– respublika bo‘yicha 65 ta tuman (shahar)da texnik ko‘rikdan o‘tkazish punktlari tashkil etilmagan.

O‘rganish natijasida:

-aniqlangan kamchiliklarni bartaraf etish;

-sohada faoliyat yurituvchi subyektlarning hisobini yuritish;

-xizmat ko‘rsatishdan tushgan naqd pul mablag‘larining bankdan tashqari aylanmasini qisqartirish;

-soliq tushumlarining to‘liqligini ta’minlashga qaratilgan chora-tadbirlarni belgilash yuzasidan O‘zbekiston Respublikasi Ichki ishlar vazirligi hamda Soliq qo‘mitasiga ko‘rsatma yuborildi.

Shuningdek, faoliyatni takomillashtirish va kelgusida budjetga tushumlarni oshirish yuzasidan tavsiyalar berildi. Xususan:

– majburiy texnik ko‘rikda nosoz deb topilgan avtotransport vositalarida aniqlangan nosozliklarni bartaraf etish va qayta texnik ko‘rikdan o‘tish muddatlarini belgilash;

– YHXX axborot tizimida texnik jihatdan malakalangan subyektlar to‘g‘risidagi ma’lumotlar almashinuvi yo‘lga qo‘yish;

– texnik ko‘rik va transport vositalarini qayta jihozlashga oid ko‘rsatilgan davlat xizmatlari ma’lumotlarini soliq idoralari axborot tizimiga integratsiya qilish;

– texnik ko‘rikdan o‘tkazish markazlari mavjud bo‘lmagan hududlarda tashabbuskor tadbirkorlik subyektlarini jalb etish orqali texnik ko‘rikdan o‘tkazish punktlarini tashkil etish;

– texnik ko‘rikdan o‘tkazish va qayta jihozlash faoliyatini amalga oshirayotgan tadbirkorlik subyektlarining soliq majburiyatlari bo‘yicha avtokameral tizimi orqali nazorat mexanizmlarini joriy qilish.