Ma’lumot uchun, INTOSAIning Big Data bo‘yicha ishchi guruhi 2016 yilda tashkil etilgan bo‘lib, u audit jarayonlarida katta hajmdagi ma’lumotlar (Big Data), sun’iy intellekt va ilg‘or raqamli texnologiyalarni samarali qo‘llashga yo‘naltirilgan xalqaro ixtisoslashgan maydon hisoblanadi. Bugungi kunda Ishchi guruh tarkibida 30 dan ortiq Oliy audit organlari faol ishtirok etmoqda.

Ushbu Ishchi guruhning raisi — Xitoy Xalq Respublikasi Milliy audit idorasi, rais o‘rinbosari esa — AQSH Oliy audit organi hisoblanadi.

Ishchi guruhning asosiy maqsadi INTOSAIning strategik maqsadi — “Bilim almashish va xizmatlar” doirasida katta hajmli ma’lumotlar va ular bilan bog‘liq texnologiyalarni audit faoliyatiga joriy etish bo‘yicha bilim va tajriba almashishdan iborat.

Ishchi guruh faoliyati quyidagi asosiy yo‘nalishlarni qamrab oladi:

- Katta hajmli ma’lumotlar auditida yuzaga keladigan muammolar va imkoniyatlarni aniqlash;

- Sun’iy intellekt, ma’lumotlar tahlili, statistik usullar va real vaqt rejimidagi monitoringni audit jarayonlariga integratsiya qilish;

- Oliy audit organlari o‘rtasida ikki tomonlama va ko‘p tomonlama texnik hamkorlikni mustahkamlash;

- O‘quv-uslubiy qo‘llanmalar, amaliy tavsiyalar va ilg‘or tajribalarni ishlab chiqish;

- Xalqaro miqyosda tajriba almashish va amaliy taqdimotlar o‘tkazish.

O‘zbekiston Respublikasi Hisob palatasining mazkur Ishchi guruh a’zoligiga qabul qilinishi davlat auditi tizimida raqamli transformatsiyani chuqurlashtirish, katta ma’lumotlar va sun’iy intellekt texnologiyalarini qo‘llash imkoniyatlarini kengaytirish, shuningdek, ilg‘or xalqaro tajribalarni joriy etish yo‘lida muhim ahamiyat kasb etadi.