Mazkur masala yuzasidan, 12 sentyab' kuni Hisob palatasida Toshkent davlat iqtisodiyot universiteti (TDIU)da davlat moliyaviy nazorati va auditi yo‘nalishida malakali kadrlarni yetishtirish tizimini yo‘lga qo‘yish masalalari muhokama qilindi.

Muhokamada Hisob palatasi raisi o‘rinbosari S. Mirzaev va tegishli tuzilmalar rahbarlari, shuningdek, Oliy ta'lim, fan va innovasiyalar vazirligi, Iqtisodiyot va moliya vazirligi, TDIU, Auditorlar palatasi, “Katta to‘rtlik”ka kiruvchi KPMG va Ernst&Young auditorlik kompaniyalari vakillari ishtirok etdi.

Uchrashuv davomida TDIUda davlat auditi yo‘nalishini tashkil etish bo‘yicha normativ hujjat loyihasiga mutaxassislar tomonidan milliy va xalqaro tajribalardan kelib chiqib, takliflar ilgari surildi. 

Ushbu tizimning asosiy maqsadi – iqtidorli yoshlarni davlat moliyaviy nazorati va auditi sohasiga maqsadli yo‘naltirish, ta'limni xalqaro standartlar va ta'lim dasturlari asosida olib borish, mazkur sohada ta'lim va ilmiy-tadqiqot ishlarini sifatli tashkil etishda manfaatdor tashkilotlar (kadrlar buyurtmachilari) hamkorligini ta'minlash.

Shu bilan birga, Universitetning o‘qitish jarayonlarini va moddiy texnika bazasini takomillashtirish orqali sohada chuqur nazariy bilim hamda amaliy ko‘nikmalarni o‘zlashtirish muhitini yaratish zarurligi ta'kidlandi. 

Mutaxassislar tomonidan bildirilgan barcha takliflar muhokama qilingan holda normativ hujjat loyihasini takomillashtirish va uni amalga oshirish chora-tadbirlarini birgalikda ishlab chiqishga kelishildi.