Ўқув тадбирлари Олий аудит органларида рискларни бошқариш тизимини такомиллаштириш, аудит жараёнларида замонавий ёндашувларни жорий этиш ҳамда халқаро тажрибани ўрганишга қаратилди.

Дастур доирасида Туркия Ҳисоб судининг Аудитни режалаштириш ва ҳисоботлар департаменти раҳбари, доктор Аҳмет Танер ҳамда бош аудитор Мине Чакир томонидан маърузалар тақдим этилди.

Хусусан, машғулотлар давомида қуйидаги мавзуларга урғу берилди:

- Олий аудит органларида рискларни бошқаришнинг назарий асослари;

- Рискларни бошқариш ва ички назорат тизими;

- Рискларни бошқаришни аудитни режалаштириш жараёнига интеграция қилиш;

- Стратегик режалаштириш ва ташкилий даражада аудитни режалаштириш;

- Қайта кўриб чиқилган ISSAI 140 аудит стандарти асосида сифатни бошқариш ва риск-таҳлил;

- Туркия Ҳисоб суди амалиётида рискларни бошқариш бўйича илғор тажрибалар.

Шунингдек, ўқув тренинглари доирасида иштирокчилар билан интерактив мулоқот ўтказилиб, рискларни бошқариш соҳасида тўпланган амалий тажриба, мавжуд муаммолар ҳамда келгусидаги устувор йўналишлар муҳокама қилинди.

3 кун давом этган онлайн ўқув тренинглари якунида иштирокчилар Олий аудит органлари фаолиятида риск-таҳлил ёндашувларини жорий этиш, аудит сифати ва самарадорлигини ошириш ҳамда халқаро стандартлар асосида бошқарув тизимини такомиллаштириш бўйича янги амалий кўникмаларга эга бўлдилар.