Семинарнинг асосий ташкилотчилари – Чехия ва Эстония Олий аудит органлари. Унда Ўзбекистон Республикаси Ҳисоб палатаси вакиллари ҳам иштирок этди.

Ушбу семинар доирасида самарали ва фойдаланувчиларга қулай рақамли давлат хизматларини яратиш йўллари муҳокама қилинди. Унда электрон хизматларининг ривожланишини аудит қилиш ва қўллаб-қувватлашда Олий аудит органларининг етакчи ўрни ва тажрибалари муҳокама қилинди.

Тадбир аввалида Чехия Республикаси Олий аудит органи раиси Милослав Кала ва Эстония Бош аудитори, Ишчи гуруҳ раиси Янар Хольм узлуксиз электрон хизматларни жорий қилишда дуч келадиган асосий вазифа ва муаммоларга урғу берди.

Сўнг Европа Комиссияси вакили, Буюк Британия, Швейцария, Нидерландия, Словения, Руминия, Болгария ва Қатар Олий аудит органлари аудиторлари томонидан тақдимотлар берилди. 

Самарали электрон хизматларини яратишнинг зарур шартларига оид панел муҳокамалар бўлиб ўтди. Университет бошқарувини такомиллаштириш ва мавжуд маълумотларнинг шаффофлик даражасини ошириш учун Интеграциялашган таълим регистридан (РЕИ) фойдаланишга оид ҳам презентация қилинди.

Шу билан бирга, давлат секторида электрон хизматларга ўтиш йўлида ахборот технологиялари аудитини ўтказишга бағишланган муҳокамалар бўлиб ўтди.

Ушбу виртуал тадбир фикр алмашиш ва муаммоларни ҳал қилиш учун динамик форум шаклида ташкил қилинди.