Давлатимиз Раҳбари томонидан қабул қилинган ПФ-100-сонли Фармон билан маҳаллий бюджетлар ижроси тўғрисидаги Ҳисоб палатасининг хулосалари Қорақалпоғистон Республикаси Жўқорғи Кенгеси ва халқ депутатлари Кенгашлари мажлисларида Ҳисоб палатаси масъуллари иштирокида муҳокама қилиниши белгиланган.

Ҳисоб палатаси томонидан жорий йилнинг май-июнь ойларида Республикамизнинг барча ҳудудларида Қорақалпоғистон Республикаси Жўқорғи Кенгеси ва халқ депутатлари Кенгашлари мажлисларида тегишли муҳокамалар ўтказилди.

Жумладан, 2025 йилнинг 29 май куни Андижон вилояти Кенгашининг сессияси бўлиб ўтди. 30 майда Халқ депутатлари Самарқанд вилояти Кенгашининг ўн учинчи сессияси бўлиб ўтди. 

Шунингдек, 30 май – 12 июнь кунлари Халқ депутатлари Жиззах, Қашқадарё вилоятлари ва Тошкент шаҳар Кенгашларининг сессияларида Ҳисоб палатаси масъуллари ушбу идоранинг маҳаллий бюджетларнинг 2024 йилдаги ижроси бўйича ҳисоботи тўғрисидаги масалалари бўйича сўзга чиқдилар.

Мазкур муҳокамалар давомида маҳалий бюджетлар ижроси жараёнида йўл қўйилган хато ва камчиликлар, ҳамда уларни бартараф этиш юзасидан Ҳисоб палатасининг таклиф ва тавсиялари ташқи аудит хулосасида акс эттирилгани таъкидланди.

Шу билан бирга, Давлатимиз Раҳбарининг Фармонига мувофиқ, 2025 йилдан бошлаб биринчи даражали бюджет маблағларини тақсимловчилар Давлат бюджети ва давлат мақсадли жамғармалари ҳисобидан ҳудудларга тақсимланган маблағлар бўйича маълумотларни тегишли халқ депутатлари Кенгашларига тақдим этиши белгиланлиги юзасидан айтиб ўтилди.

Халқ депутатлари Кенгашлари томонидан маҳаллий бюджетларга Давлат бюджети, Давлат мақсадли жамғармалари ва Халқаро молия институтлари ҳисобидан ажратилаётган маблағлар бўйича Фармон ижроси юзасидан сўровлар ва назоратнинг ўрнатилиши орқали бюджет маблағларидан оқилона, мақсадли ҳамда самарали фойдаланилиши ва шаффофликни кучайтирилишига эришилади.

Сессиялар очиқ муҳокама ва конструктив фикр алмашинуви шаклида бўлиб ўтди. Ҳар бир масала юзасидан тегишли қарорлар қабул қилинди.