Учрашувлар аввалида меҳмонларга Ўзбекистон ва Латвия ўртасидаги икки томонлама муносабатлар, жумладан, парламентлараро ҳамкорликнинг сўнгги йилларда барқарор ривожланиб бораётгани, Сенат ва Қонунчилик палатаси, унинг қўмиталари ва комиссиялари фаолияти, қонун ижодкорлиги жараёнлари ҳақида атрофлича маълумот берилди.

Суҳбатлар давомида давлат аудити соҳасидаги икки томонлама ҳамкорликни янада кенгайтириш, замонавий аудит ёндашувларини татбиқ этиш ҳамда ахборотга асосланган бошқарув амалиётини ривожлантириш масалалари муҳокама қилинди.

Эдгарс Корчагинс Латвиянинг замонавий аудит амалиёти ҳақида маълумот берар экан, мамлакатда асосий эътибор самарадорлик ва мувофиқлик аудитларига қаратилганлигини айтиб ўтди. Барқарор бошқарув тизими туфайли молиявий аудитларга эҳтиёж камайгани ҳам таъкидланди. Шунингдек, хусусий аудиторлар ва ички аудит бўлимларининг давлат аудити тизимидаги иштироки алоҳида қайд этилди.

Латвияда давлат аудити тавсияларидан бюджет жараёнида фойдаланиш амалиёти билан ўртоқлашилди. Хусусан, ҳар йили бюджет даромадларини ошириш ёки харажатларни қисқартиришга хизмат қиладиган тавсиялар бўйича махсус маълумот тайёрланиши ва унинг Ҳукумат ҳамда Парламент томонидан қарорлар қабул қилишда қўлланилиши таъкидланди.

Латвия томони Ўзбекистонда стратегик бошқарув, мониторинг ва баҳолаш тизимларини такомиллаштириш бўйича амалга оширилаётган ислоҳотлар юқори баҳоланди. Аудит жараёнларида ахборот технологияларидан фойдаланиш ва рақамлаштириш тамойилларига ўтиш давлат бошқаруви самарадорлигини оширишда муҳим қадам экани таъкидланди.

Мулоқот давомида давлат дастурлари натижаларини таҳлил қилиш ва ахборот тизимларини интеграция қилиш масалалари бўйича ҳам ҳамкорлик истиқболлари муҳокама қилинди.

Учрашув якунлари бўйича самарадорлик аудитлари, хатарларни баҳолаш ва ички аудиторлар билан ҳамкорлик амалиёти бўйича ўзаро тажриба алмашиш амалий ҳамкорликни давом эттиришга келишиб олдилар.