Uchrashuvda O‘zbekiston Respublikasi Hisob palatasi raisi birinchi o‘rinbosari M. Abdullayev va Ozarbayjon Hisob palatasi delegatsiyasi rahbari T. Yusif-zade boshchiligidagi delegatsiya a’zolari ishtirok etdi.

Ta’kidlanganidek, ayni paytda ikki mamlakat Hisob palatalari INTOSAI, ASOSAI, ECOSAI, MDHga a’zo davlatlar Oliy audit organlari kengashi hamda Turkiy tilli davlatlar Oliy audit organlari kengashi — TURKSAI doirasida ham faol hamkorlik qilib kelmoqda.

Joriy yil mart oyida Ozarbayjon Hisob palatasi raisi V. Gulmammadov boshchiligidagi delegatsiyaning O‘zbekistonga tashrifi doirasida ikki tashkilot o‘rtasida Hamkorlik to‘g‘risidagi memorandum imzolangan edi.

Hujjatda tashqi davlat auditi metodologiyalari bo‘yicha tajriba almashish, xodimlarning professional tayyorgarligi va ko‘nikmalarini rivojlantirish, kasbiy ma’lumot va hujjatlar almashinuvi, o‘zaro maslahatlashuvlar, qo‘shma tadqiqotlar, parallel auditlar, seminarlar, konferensiyalar va vebinarlar o‘tkazish kabi yo‘nalishlar belgilangan.

Memorandum imzolanganidan so‘ng o‘zaro hamkorlik yanada faollashdi. Xususan, 2026-yil davomida Ozarbayjon Hisob palatasining 4 ta delegatsiyasi O‘zbekistonga tashrif buyurdi.

23-avgust kuni esa raqamlashtirish va axborot texnologiyalari sohasida O‘zbekiston tajribasini o‘rganish maqsadida 5 nafar ozarbayjonlik ekspert tashrif buyurdi. Mazkur tashrif davlat auditini raqamlashtirish, zamonaviy axborot texnologiyalaridan foydalanish va sun’iy intellekt imkoniyatlarini audit jarayonlariga joriy etish borasida tajriba almashishga qaratildi.

Uchrashuvda hamkorlikni kelgusida yanada kengaytirish bo‘yicha aniq takliflar bildirildi.

Jumladan, tashqi davlat auditi metodologiyalari bo‘yicha yangi tajriba almashish, Ozarbayjonning davlat budjeti loyihasi auditi, davlat mulkini boshqarishga rioya qilish auditi, ta’lim muassasalarini boshqarish auditi, ta’lim tizimida axborot texnologiyalarining samaradorligi auditi hamda oziq-ovqat xavfsizligi tizimini moliyaviy qo‘llab-quvvatlash auditi sohalaridagi tajribasini o‘rganish masalalariga e’tibor qaratildi.

Shuningdek, qo‘shma ilmiy tadqiqotlar, parallel va qo‘shma auditlar o‘tkazish, seminar va vebinarlar tashkil etishni yo‘lga qo‘yish taklif etildi. Bu ikki mamlakatdagi o‘xshash jarayonlarni qiyosiy o‘rganish, umumiy muammolarni aniqlash va samarali yechimlarni ishlab chiqish imkonini beradi.

Uchrashuvda O‘zbekiston Hisob palatasining raqamlashtirish va sun’iy intellekt sohasidagi tajribasini Ozarbayjon tomoni bilan bo‘lishish alohida istiqbolli yo‘nalish sifatida qayd etildi.

Bunda asosiy maqsad davlat auditida raqamli texnologiyalar, ma’lumotlar tahlili va sun’iy intellektdan foydalanish orqali qonunbuzilishlarni faqat aniqlash emas, balki ularning oldini olishga qaratilgan zamonaviy yondashuvlarni rivojlantirishdan iborat.

Ozarbayjonlik ekspertlar O‘zbekiston Hisob palatasida amalga oshirilayotgan islohotlarga yuqori baho berdilar.

Uchrashuv yakunida tomonlar ikki Hisob palatasi o‘rtasidagi do‘stona va ishonchli munosabatlarni yanada mustahkamlash, Memorandumda belgilangan vazifalarni amaliy jihatdan kengaytirish, ekspertlar almashinuvini davom ettirish hamda qo‘shma va parallel auditlarni tashkil etish borasida hamkorlikni izchil davom ettirishga kelishib oldilar.