Delegatsiya vakillari O‘zbekistonga birinchi bor tashrif buyurganliklarini ta’kidlab, ushbu mamlakat ularni o‘zining boy tarixi, samimiy mehmondo‘stligi va jadal rivojlanayotgan iqtisodiyoti bilan hayratga solganini aytib o‘tdi. Poytaxt Toshkent shahrini esa zamonaviylik va an’anaviylikning uyg‘un qo‘shilmasi sifatida ko‘z oldiga keltirishini ta’kidladi.

O‘zbekistonning so‘nggi yillarda amalga oshirgan islohotlari, ayniqsa raqamli transformatsiya sohasidagi yutuqlari delegatsiya a’zolarida chuqur taassurot qoldirganini qayd etib, davlat boshqaruvida shaffoflikni ta’minlash va elektron hukumatni rivojlantirish borasidagi izchil sa’y-harakatlarni yuqori baholadi.

Shuningdek, konferensiya davomida Hisob palatasining Masofaviy audit markazi ish faoliyati bilan yaqindan tanishish imkoniyati bo‘lganligiga to‘xtalib, markazda real vaqt rejimida masofaviy audit o‘tkazish imkoniyati yaratilganligini va ma’lumotlar xavfsizligini ta’minlovchi ilg‘or texnologiyalardan samarali foydalanilayotganligini alohida qayd etdi.

Bundan tashqari, markaz dasturlarida sun’iy intellekt asosida avtomatik tahlil modullari yaratilayotganligi Bangladesh uchun ham ibratli namuna ekanligi ta’kidlandi.

Hamkorlik masalalariga to‘xtalib, delegatsiya Bangladesh Bosh audit idorasi (Comptroller and Auditor General of Bangladesh) va O‘zbekiston Hisob palatasi o‘rtasidagi hamkorlikni INTOSAI va ASOSAI doirasida yanada chuqurlashtirish zarurligini alohida ta’kidladi.

Shu maqsadda quyidagi amaliy takliflar ilgari surildi:

-ikki mamlakat auditorlari uchun birgalikda onlayn trening platformasini yaratish;

-IT auditi bo‘yicha yagona metodologik qo‘llanma ishlab chiqish;

-kiberxavfsizlik auditi sohasida tizimli tajriba almashish.

Delegatsiya a’zolari konferensiyani yuqori saviyada tashkil etgani uchun O‘zbekiston Hisob palatasi rahbariyati va barcha xodimlariga chuqur minnatdorlik bildirdi hamda ikki davlat o‘rtasidagi do‘stlik va hamkorlik munosabatlari yanada mustahkamlanishiga ishonch bildirdi.