Uning ta’kidlashicha, bugungi kunda davlat moliyaviy nazorati tizimida raqamli texnologiyalar, Big Data va sun’iy intellekt vositalarini joriy etish oliy audit organlari faoliyatining eng ustuvor yo‘nalishlaridan biriga aylanmoqda.

Jumladan:

“Hozirgi davrda davlat boshqaruvi tizimida ma’lumotlar hajmi keskin oshib bormoqda. Bu esa audit jarayonlarida an’anaviy yondashuvlar bilan bir qatorda intellektual tahlil va raqamli monitoring mexanizmlarini keng qo‘llashni talab etadi.

Toshkent shahrida tashkil etilgan mazkur xalqaro konferensiya aynan shu jihatdan juda muhim amaliy platforma bo‘lib xizmat qiladi.”

Ekspertning qayd etishicha, O‘zbekistonda davlat auditini raqamlashtirish, davlat boshqaruvida shaffoflikni kuchaytirish hamda elektron nazorat mexanizmlarini rivojlantirish bo‘yicha amalga oshirilayotgan ishlar yuqori bahoga loyiq.

“Biz O‘zbekiston Respublikasi Hisob palatasining Masofaviy audit markazi faoliyati bilan yaqindan tanishdik. Ushbu tizim orqali xatarlarni erta aniqlash, tahlillarni avtomatlashtirish va tekshiruvlarni maqsadli tashkil qilish imkoniyatlari juda katta qiziqish uyg‘otdi.

Bu tajriba nafaqat mintaqa davlatlari, balki barcha oliy audit organlari uchun muhim namuna bo‘la oladi.”

Shuningdek, uning fikricha, O‘zbekiston va Qozog‘iston o‘rtasidagi strategik sheriklik munosabatlari oliy audit organlari o‘rtasidagi hamkorlik uchun ham mustahkam asos bo‘lib xizmat qilmoqda.

“Qozog‘iston va O‘zbekiston o‘rtasidagi do‘stona munosabatlar barcha sohalar qatori audit va raqamli transformatsiya yo‘nalishida ham izchil rivojlanmoqda.

Biz tajriba almashish, IT-audit, ma’lumotlar tahlili va sun’iy intellekt texnologiyalarini davlat auditiga joriy qilish bo‘yicha hamkorlikni yanada kengaytirishdan manfaatdormiz.”

Ta’kidlash joizki, mazkur xalqaro konferensiya Osiyo Oliy audit organlari xalqaro tashkiloti — ASOSAI platformasida tashkil etilgan bo‘lib, unda dunyoning qator davlatlaridan kelgan ekspertlar ishtirokida davlat auditining raqamli kelajagi, IT-audit, Big Data tahlili va sun’iy intellekt imkoniyatlari muhokama qilindi.

Qozog‘istonlik ekspert yakunda quyidagilarni ta’kidladi:

“Bunday xalqaro muloqot platformalari kelgusida ham davlat auditi samaradorligini oshirish, zamonaviy texnologiyalarni joriy etish va professional hamkorlikni mustahkamlashda muhim ahamiyat kasb etadi.”