Konferensiyaning mazkur bosqichi davlat auditida raqamli texnologiyalar, sun’iy intellekt va innovatsion yechimlarni amaliyotga joriy etish masalalariga bag‘ishlandi.

Ikkinchi kun doirasida AZOSAI va INTOSAIga a’zo davlatlar oliy audit organlari vakillari, xalqaro ekspertlar hamda Toshkentda faoliyat yuritayotgan IT kompaniyalar mutaxassislari ishtirokida tajriba almashinuvi va amaliy muhokamalar tashkil etildi.

Muhokamalarda quyidagi yo‘nalishlar alohida e’tibor markazida bo‘ldi:

-davlat auditida sun’iy intellekt texnologiyalaridan foydalanish;

-katta hajmli ma’lumotlar (Big Data) asosida tahliliy yondashuvlar;

-masofaviy audit va avtomatlashtirilgan nazorat tizimlari;

-kiberxavfsizlik va ma’lumotlarni himoya qilish;

-riskka asoslangan audit metodologiyalarini joriy etish.

Shu bilan birga, Xitoy milliy audit idorasi vakili tomonidan Xitoy Milliy audit idorasining davlat auditida katta hajmli ma’lumotlar (Big Data)ni intellektual tahlil qilish sohasidagi muammolar va innovatsion yechimlar bo‘yicha ilg‘or tajribasi mavzusida taqdimot namoyish etildi.

Undan tashqari, Armaniston, Vengriya, Chexiya va Ozarbayjon Respublikalari Oliy audit organi vakillari tomonidan quyidagi mavzular yoritildi:

Keyingi avlod Oliy audit organi: Raqamli transformatsiyaning kun tartibi;

Bir kechada 3 495 ta skanerlangan hujjatni (164 672 sahifa) qayta ishlash;

Xizmatlar katalogi raqamli yetuklik ko‘zgusi sifatida: davlat boshqaruvini raqamlashtirishni baholash bo‘yicha Chexiya tajribasi;

Katta hajmli ma’lumotlar asosida davlat auditi tahlili.

Shuningdek, ishtirokchilarga raqamli audit sohasida amalga oshirilayotgan islohotlar, jumladan avtomatlashtirilgan monitoring tizimlari va sun’iy intellektga asoslangan tahlil platformalari namoyish etildi.

Xalqaro delegatsiya vakillari “IT Park”da tashkil etilgan muhitni yuqori baholab, O‘zbekistonda raqamli iqtisodiyot va innovatsion texnologiyalar sohasida amalga oshirilayotgan islohotlar xalqaro standartlarga mos ekanini alohida ta’kidladilar.

Konferensiya ishtirokchilari ushbu tashrif davlat auditi sohasida zamonaviy raqamli yechimlarni keng joriy etish, xalqaro hamkorlikni mustahkamlash va tajriba almashinuvini yanada rivojlantirishda muhim ahamiyat kasb etishini qayd etdilar.