Mazkur tadbir PF-252-son Farmon ijrosini ta’minlash doirasida o‘tkazilib, davlat moliyaviy nazoratini yanada tizimli ravishda kuchaytirishga qaratildi.

Seminarda vazirlik rahbariyati hamda tizimga kiruvchi 7 ta tashkilotdan 32 nafardan ortiq mas’ul rahbar va mutaxassislar, jumladan bosh hisobchilar, ichki audit va komplaens xizmatlari vakillari ishtirok etdi.

Tadbir davomida Hisob palatasining vazirlikdagi vakili — Bosh inspektor J. Kosimov tomonidan kun tartibidagi masalalar, xususan, Prezident farmonining mazmun-mohiyati, sohada joriy etilayotgan yangi yondashuvlar va davlat auditi tizimining ustuvor yo‘nalishlari yuzasidan tushuntirishlar berildi.

Qayd etilganidek, 2026-yil 1-apreldan boshlab davlat organlarida Hisob palatasi vakili — bosh inspektor instituti joriy etilgan bo‘lib, mazkur tizim moliyaviy nazorat samaradorligini oshirishda muhim o‘rin tutmoqda.

Ma’lumot uchun, O‘zbekiston Respublikasining “2026-yil uchun O‘zbekiston Respublikasining Davlat byudjeti to‘g‘risida”gi Qonuniga muvofiq O‘zbekiston Respublikasi Kambag‘allikni qisqartirish va bandlik vazirligiga ajratiladigan byudjet mablag‘lari jami 582,8 mlrd so‘mni tashkil etib, shundan 300,0 mlrd so‘mi (51,5 foiz) hokim yordamchilari faoliyatini qo‘llab-quvvatlash jamg‘armasiga, 150,0 mlrd so‘mi (25,7 foiz) Bandlikka ko‘maklashish davlat jamg‘armasiga hamda 50,0 mlrd so‘mi (8,6 foiz) Dehqon xo‘jaliklari va tomorqa yer egalari faoliyatini qo‘llab-quvvatlash jamg‘armasiga transfertlar sifatida yo‘naltirilishi rejalashtirilgan.

Shu bilan birga, zamonaviy raqamli texnologiyalar va doimiy monitoring tizimlari orqali byudjet mablag‘lari harakati ustidan kuchaytirilgan nazorat o‘rnatish choralari bosqichma-bosqich joriy etilayotgani ta’kidlandi. Bu esa davlat resurslaridan foydalanish samaradorligini oshirish va shaffoflikni ta’minlashga xizmat qiladi.

Tadbir yakunida ishtirokchilarga moliyaviy intizomni mustahkamlash, qonunbuzilishlarning oldini olish hamda nazorat samaradorligini yanada oshirish bo‘yicha aniq vazifalar belgilab berildi.