Tabriknomada Palataning milliy audit tizimini rivojlantirish va malakali kadrlarni tayyorlashdagi muhim o‘rni alohida ta’kidlandi.

Chorak asr davomida Auditorlar palatasi yuzlab malakali mutaxassislarni birlashtira oldi, zamonaviy kasbiy maktabni shakllantirdi va xususiy sektorda tashqi auditni rivojlantirishga salmoqli hissa qo‘shdi.

Ayniqsa, auditorlarni sertifikatlashtirish va ularning malakasini oshirish tizimini takomillashtirish bo‘yicha erishilgan natijalar e’tirof etildi.

Tabriknomada davlat auditining oliy organi bo‘lgan Hisob palatasi hamda mustaqil audit instituti sifatidagi Auditorlar palatasi bir-birini to‘ldiruvchi tuzilmalar hisoblanishi qayd etildi.

Ular o‘rtasidagi hamkorlikning izchil mustahkamlanib borishi mamlakatning moliyaviy shaffofligini oshirishga va jamoatchilik ishonchini kuchaytirishga xizmat qilmoqda.

Konferensiya ishtirokchilariga murojaat etar ekan, Hisob palatasi vakillari xalqaro forum doirasidagi muhokamalar va ekspert tahlillari O‘zbekistonda audit sohasining institutsional va huquqiy asoslarini yanada mustahkamlashga qaratilgan yangi g‘oya va takliflar uchun asos bo‘lishini bildirdilar.

Tabriknoma yakunlanar ekan, Hisob palatasi Auditorlar palatasining barcha a’zolarini ushbu qutlug‘ sana bilan tabriklab, ularga mustahkam sog‘liq, farovonlik va kasbiy faoliyatlarida yangi muvaffaqiyatlar tiladi.