Uchrashuvlar avvalida mehmonlarga O‘zbekiston va Latviya o‘rtasidagi ikki tomonlama munosabatlar, jumladan, parlamentlararo hamkorlikning so‘nggi yillarda barqaror rivojlanib borayotgani, Senat va Qonunchilik palatasi, uning qo‘mitalari va komissiyalari faoliyati, qonun ijodkorligi jarayonlari haqida atroflicha maʼlumot berildi.

Suhbatlar davomida davlat auditi sohasidagi ikki tomonlama hamkorlikni yana-da kengaytirish, zamonaviy audit yondashuvlarini tatbiq etish hamda axborotga asoslangan boshqaruv amaliyotini rivojlantirish masalalari muhokama qilindi.

Edgars Korchagins Latviyaning zamonaviy audit amaliyoti haqida maʼlumot berar ekan, mamlakatda asosiy eʼtibor samaradorlik va muvofiqlik auditlariga qaratilganligini aytib o‘tdi. Barqaror boshqaruv tizimi tufayli moliyaviy auditlarga ehtiyoj kamaygani ham taʼkidlandi. Shuningdek, xususiy auditorlar va ichki audit bo‘limlarining davlat auditi tizimidagi ishtiroki alohida qayd etildi.

Latviyada davlat auditi tavsiyalaridan byudjet jarayonida foydalanish amaliyoti bilan o‘rtoqlashildi. Xususan, har yili byudjet daromadlarini oshirish yoki xarajatlarni qisqartirishga xizmat qiladigan tavsiyalar bo‘yicha maxsus maʼlumot tayyorlanishi va uning Hukumat hamda Parlament tomonidan qarorlar qabul qilishda qo‘llanilishi taʼkidlandi.

Latviya tomoni O‘zbekistonda strategik boshqaruv, monitoring va baholash tizimlarini takomillashtirish bo‘yicha amalga oshirilayotgan islohotlar yuqori baholandi. Audit jarayonlarida axborot texnologiyalaridan foydalanish va raqamlashtirish tamoyillariga o‘tish davlat boshqaruvi samaradorligini oshirishda muhim qadam ekani taʼkidlandi.

Muloqot davomida davlat dasturlari natijalarini tahlil qilish va axborot tizimlarini integratsiya qilish masalalari bo‘yicha ham hamkorlik istiqbollari muhokama qilindi.

Uchrashuv yakunlari bo‘yicha samaradorlik auditlari, xatarlarni baholash va ichki auditorlar bilan hamkorlik amaliyoti bo‘yicha o‘zaro tajriba almashish amaliy hamkorlikni davom ettirishga kelishib oldilar.