Yig‘ilish boshida joriy yilning besh oyidagi iqtisodiy-ijtimoiy ko‘rsatkichlar qayd etildi. Bu davrda sanoat 6,4 foiz o‘sgan, eksport miqdori 18 foiz, xorijiy investisiyalar 46 foiz oshgan. Qiymati 3 milliard dollarlik 2 ming 500 dan ziyod yangi quvvat ishga tushgan. 2 million 400 ming odam daromadli bo‘lgan. 

Yig‘ilishda tizimli masalalar hududlar va tarmoqlar kesimida tahlil qilinib, kamchiliklar ko‘rsatib o‘tildi. Shu bois ijro intizomini mustahkamlash, aholi muammolari bilan ishlash bo‘yicha yangi tizim yo‘lga qo‘yilishi belgilandi.

Bundan buyon ijro intizomiga Hisob palatasi mas'ul bo‘lib, uning vakolatlari kengaytirilishi Prezidentimiz tomonidan belgilandi. 

Endi Hisob palatasi qarorlar bilan berilgan mablag‘larning faqatgina to‘g‘ri sarflanishi emas, balki qanday samara bergani va aholi bundan qanchalik rozi bo‘lganini ham o‘rganadi. 

Hisob palatasi har bir qaror ijrosi natijadorligini tahlil qilib, zaif nuqtalar, rahbarlar va ishlamayotgan tizimlar bo‘yicha o‘z taklifini har oyda Prezidentga kiritadi.  

Shu bilan birga, Hisob palatasiga bir oy ichida Toshkent shahrida o‘zini oqlagan “Xalq nazorati” elektron portalini butun respublikada ishga tushirish topshirildi. Ushbu portal orqali aholi qurilish, obodonlashtirish va infratuzilma muammolarini suratga olib va aniq manzilini ko‘rsatgan holda mobil ilova orqali yuboradi. Masalalarning qanchalik tez va sifatli hal etilishiga qarab, hokimlar faoliyati kunlik baholab borilishi ko‘rsatib o‘tildi. Bu tizim murojaatlarning yagona platformasi bo‘ladi va unga barcha vazirlik, idora, hokimliklar ulanadi.  

Yig‘ilishda muhokama qilingan masalalar yuzasidan Prezident maslahatchilari, Hukumat a'zolari, vazirlar va hokimlar axborot berdi.