Бу ҳақда Филиппин Республикаси Аудит комиссияси раиси ҳамда INTOSAI Давлат қарзи бўйича ишчи гуруҳи (WGPD) раиси Гамалиэл Кордоба томонидан юборилган расмий мактубда маълум қилинди.

Унда Ўзбекистон Республикаси Ҳисоб палатасининг INTOSAI Давлат қарзи бўйича ишчи гуруҳи фаолиятида иштирок этиш истаги юксак баҳолангани ҳамда Ишчи гуруҳ Низоми талабларига мувофиқ, шунингдек, WGPD раиси ўринбосари – Аргентина Олий аудит ташкилоти билан ўтказилган маслаҳатлашувлар натижасида Ҳисоб палатаси мазкур ишчи гуруҳнинг янги аъзоси сифатида қабул қилингани қайд этилган.

Маълумот учун: INTOSAIнинг Давлат қарзи бўйича ишчи гуруҳи давлат қарзини аудит қилиш соҳасида энг юқори халқаро стандартларни илгари суриш, давлат қарзини самарали бошқаришга оид илғор амалиётларни ривожлантириш, олий аудит органлари ўртасида билим ва тажриба алмашиш, услубий қўлланмалар ишлаб чиқиш ҳамда мазкур йўналишдаги халқаро ҳамкорликни мустаҳкамлашга қаратилган нуфузли эксперт платформаси ҳисобланади.

Мактубда Ўзбекистон Республикаси Ҳисоб палатасининг ишчи гуруҳдаги иштироки нафақат миллий аудит тизимини янада такомиллаштиришга, балки INTOSAI доирасида давлат қарзи аудитини ривожлантириш бўйича амалга оширилаётган умумий саъй-ҳаракатларни янада кучайтиришга хизмат қилишига ишонч билдирилган.

INTOSAIнинг Давлат қарзи бўйича ишчи гуруҳига аъзо бўлиш Ўзбекистон Республикаси Ҳисоб палатаси учун давлат қарзини аудит қилиш соҳасида илғор халқаро тажрибаларни ўрганиш, замонавий ёндашув ва методологияларни миллий амалиётга жорий этиш, шунингдек, мазкур йўналишда халқаро экспертлар билан самарали ҳамкорликни янада кенгайтиришда муҳим аҳамият касб этади