Тадбирда давлат органлари, хорижий экспертлар, халқаро ташкилотлар вакиллари, илмий доиралар ҳамда ҳуқуқни муҳофаза қилиш органлари мутахассислари қатнашди.

Конференция доирасида жиноий даромадларни легаллаштиришга қарши кураш, коррупцияга қарши сиёсат, киберхавфсизлик, сунъий интеллектни ҳуқуқий тартибга солиш, миграция жараёнларида инсон ҳуқуқлари, шунингдек, рақамли трансформация шароитида ҳуқуқни муҳофаза қилиш соҳасида таълим масалаларига бағишланган параллел сессиялар ташкил этилди.

Тадбирнинг ялпи мажлисида Ҳисоб палатаси раиси ўринбосари С. Мирзаев мамлакатимизда коррупцияга қарши курашиш, давлат молиявий назоратини такомиллаштириш, очиқлик ва шаффофликни таъминлаш борасида амалга оширилаётган ислоҳотлар ҳақида маълумот берди.

Халқаро ҳамкорликнинг мустаҳкамланиши, илғор тажрибаларни ўрганиш ва давлат молиявий аудитини рақамлаштириш жараёнида сунъий интеллектдан фойдаланиш масалаларига урғу берилди.

Конференциянинг “Коррупция 2.0: рақамли хатарлар ва инновацион ечимлар” йўналишидаги сессияда Ҳисоб палатаси бош инспектори, техника фанлари доктори Ш.Файзиев “Давлат аудитида сунъий интеллект технологияларини қўллаш орқали коррупцион ҳолатларни олдини олиш” мавзусида маъруза қилди. 

Тақдимотда сунъий интеллект асосида реал вақт режимида рискларни аниқлаш имкониятлари, давлат харидлари, субсидия ва грантлар мониторингида автоматлаштирилган ечимлар, коррупцион омилларни эрта аниқлаш ва олдини олишда маълумотлар таҳлилининг аҳамияти ёритилди. Шунингдек, Ҳисоб палатасида жорий этилаётган рақамли аудит элементлари ва истиқболдаги лойиҳалар каби масалаларга эътибор қаратилди.

Конференция очиқ ва конструктив мулоқот форматида бўлиб ўтди.

Тадбир давомида БМТ, ЕХҲТ, Европа Иттифоқи, ЮНЕСКО, ИҲТТ ва бошқа нуфузли халқаро ташкилотлар вакилларининг фикрлари тингланди.

Мазкур халқаро анжуман ҳуқуқни муҳофаза қилиш, коррупцияга қарши курашиш, киберхавфсизлик ва миграция соҳаларида юзага келаётган глобал чақириқларни баҳолаш, уларнинг ечимлари бўйича давлат органлари ва халқаро ҳамжамият вакилларининг амалий фикр алмашинуви учун самарали платформа бўлди.