Ўзбекистон – Венгрия Олий аудит органлари Маслаҳатлашув кенгашининг Самарқанддаги биринчи учрашуви

Аввал хабар қилинганидек, Венгрия Давлат аудит идораси раиси Ласло Виндиш бошчилигидаги делегация Ўзбекистонга ташриф билан бўлиб турибди.

Ташриф доирасида Ўзбекистон ва Венгрия Олий аудит органлари Маслаҳатлашув кенгашининг биринчи учрашуви Самарқанд шаҳрида бўлиб ўтди. Икки кун давом этган учрашувда томонлар ўзаро аудит тажрибасини бирлаштириш, янги лойиҳаларни ишлаб чиқиш ва барқарор ривожланиш йўналишлари бўйича келишувларга эришилди.

Тадбирда Ўзбекистон Ҳисоб палатаси раисининг биринчи ўринбосари М. Абдуллаев аввало Ўзбекистон-Венгрия юқори даражадаги стратегик шериклик ва кўп қиррали ҳамкорлик муносабатларига тўхталиб ўтди.

Икки мамлакат Олий аудит органлари ўртасида ташқи давлат аудити, халқаро аудит стандартлари (ИССAИ)ни жорий қилиш, IT-аудит соҳаларида ўзаро тажрибани ўрганиш тизимли амалга оширилиши муҳимлиги қайд этилди.

Маслаҳатлашув кенгашининг учрашуви доирасида давлат бюджети харажатлари ва даромадлари аудити, давлат харидлари, рақамлаштириш ва ахборот технологиялари йўналишлари бўйича Ҳисоб палатасида амалга оширилаётган трансформация жараёнлари тўғрисида презентациялар тақдим этилди. Ўзбекистоннинг ушбу йўналишлардаги тажрибаси Венгрия томонидан катта қизиқиш билан қабул қилинди.

Венгрия Давлат аудит идораси вакиллари эса марказий бюджет мониторинги ва қисқа муддатли прогнозлаштириш, рақамли трансформация ва сунъий интеллект ечимлари бўйича тақдимотлар қилди.

Келажакдаги ҳамкорликнинг асосий йўналишлари сифатида аудит стандартлари ва методологияларини такомиллаштириш, идоралараро илмий-амалий тадқиқотларни амалга ошириш, онлайн маслаҳатлашувлар, ўзаро билим алмашинуви ҳамда кадрлар салоҳиятини ошириш мақсадида биргаликдаги дастурлар ишлаб чиқиш кўзда тутилди. 

Ташриф якунида Ўзбекистон ва Венгрия Олий аудит органлари ўртасида 2025-2027 йилларга мўлжалланган ҳамкорлик бўйича амалий чора-тадбирлар режаси имзоланди.

Унга кўра, Маслаҳатлашув кенгашининг учрашувларини ҳар йили бир маротаба ўтказиш, идоралараро профессионал ҳужжатларнинг ўзаро алмашинуви, икки идора тузилмалари ўртасида профессионал даражада маслаҳатлашувлар юзасидан келишувларга эришилди.

Томонлар мунтазам тарзда рақамлаштириш, масофавий мониторинг ва хавфларни баҳолаш, марказий бюджет мониторинги ва Олий аудит органининг прогнозлаштириш таҳлиллари, идоранинг фаолиятини кенгайтириш соҳаларида мунтазам вебинарлар ташкил қилади.

Венгрия делегацияси, шунингдек, Самарқанд вилояти хокими А. Бобоев билан икки томонлама учрашувда иштирок этди. Унда икки томон ўртасидаги ҳудудий ҳамкорликни кенгайтириш масалалари муҳокама этилди. Самарқанд вилоятининг транзит аҳамияти ва стратегик ўрнини таъкидлаган холда, Венгрия билан муносабатларни янада ривожлантириш бўйича амалий таклифлар илгари сурилди.

Умуман олганда, Венгрия Давлат аудит идораси раиси Ласло Виндишнинг Ўзбекистонга ташрифи идоралар ўртасидаги муносабатларни янги босқичга олиб чиқишга хизмат қилди.