Musobaqaning ochilish marosimida O‘zbekiston Respublikasi Hisob palatasi raisining birinchi o‘rinbosari Mehriddin Abdullayev, Sport vaziri Adkham Ikramov ishtirok etdi.

Tadbir dasturidan milliy taomlar ko‘rgazmasi, sport chiqishlari va turli musobaqalar o‘rin oldi.

Ishtirokchilar uchun o‘zbek milliy qadriyatlari va sport an’analarini namoyon etuvchi ko‘rgazmalar tashkil qilinib, sport ustalari tomonidan qiziqarli chiqishlar namoyish etildi.

Shuningdek, konferensiya ishtirokchilari o‘rtasida “Audit va sport birligi” shiori ostida “Shaxmat”, “Arqon tortish”, “Armrestling”, “Stol tennisi”, “Darts” sport turlari bo‘yicha musobaqalar o‘tkazildi. Mazkur musobaqalar ishtirokchilarning faol ishtiroki, do‘stona muhit va samimiy muloqot ruhida kechdi.

Musobaqalarda poytaxtimizda o‘tkazilgan “Audit jarayonlarini raqamlashtirish va katta hajmli (Big Data) ma’lumotlarni sun’iy intellekt orqali tahlil qilish” mavzusidagi xalqaro konferensiyaga tashrif buyurgan 30 dan ortiq davlatlarning audit tashkilotlari vakillari ishtirok etdi.

Tadbirda ta’kidlanganidek, bugun audit sohasi xodimlari nafaqat moliyaviy intizom va shaffoflikni ta’minlash, balki jismonan faol, ma’nan barqaror va jamoaviy hamjihatlikka ega mutaxassis sifatida ham namoyon bo‘lmoqda.

Tadbir yakunida barcha ishtirokchilarga esdalik sovg‘alari tantanali ravishda topshirildi.

Bu kabi tadbirlar xalqaro hamkorlikni mustahkamlash, ishtirokchilar o‘rtasida o‘zaro do‘stlik va professional aloqalarni rivojlantirishga xizmat qilishi ta’kidlandi.

Shuningdek, mehmonlar Prezidentimiz tashabbuslari bilan barpo etilgan zamonaviy Olimpiya shaharchasidan o‘rin olgan zamonaviy sport inshootlari bilan ham yaqindan tanishdilar.