Strategiyada ustav kapitalida davlat ulushi 50 foiz va undan ortiq bo‘lgan korxonalar faoliyatini takomillashtirishga qaratilgan 160 ta topshiriq va maqsadli ko‘rsatkichlar belgilangan.

Audit davomida 124 ta (78 %) topshiriq ijrosi ta'minlangani, 10 tasi (6 %) davom etayotgani ma'lum bo‘ldi.

Strategiyada belgilangan vazifalar va maqsadli ko‘rsatkichlar bajarilishi oqibatida quyidagi ijobiy natijalarga erishilgan:

– Davlat mulkini boshqarish va xususiylashtirish sohasidagi 40 ta qonunchilik hujjatlari takomillashtirilgan, 32 ta normativ-huquqiy hujjat qabul qilingan; 

– faoliyat ko‘rsatmayotgan, zarar ko‘rib ishlayotgan va past rentabelli 736 ta davlat ishtirokidagi korxonalar tugatilgan;  

– Davlat ishtirokidagi korxonalar soni 67 foizga qisqartirilgan;

– korxonalar faoliyatining moliyaviy ko‘rsatkichlari yaxshilangan;

– faoliyat xususiyatlaridan kelib chiqqan holda zamonaviy korporativ boshqaruv tizimi elementlari amaliyotga tatbiq etilgan.

Shuningdek, qonunchilik bazasi va monitoring tizimi mavjud emasligi hamda amaliy choralar ko‘rilmagani sababli 26 ta (16 %) topshiriq ijrosi o‘z muddatida ta'minlanmagan.

Hisob palatasi tomonidan audit natijalari bo‘yicha Strategiyada belgilangan maqsadlarga erishishni ta'minlash yuzasidan taklif va tavsiyalar ishlab chiqilib, Vazirlar Mahkamasiga taqdim etildi.