Ushbu seminar O‘zbekiston Respublikasi Prezidentining 2024-yil 10-iyuldagi PF-100-sonli farmoni va 2025-yil 30-apreldagi PQ-153-sonli qarori ijrosini ta'minlash maqsadida O‘zbekiston Respublikasi Hisob palatasi tashabbusi va Raqamli texnologiyalar vazirligi hamkorligida tashkil etildi.

Seminarda Hisob palatasi, Raqamli texnologiyalar, Ichki ishlar vazirliklari, Markaziy bank va “Kiberxavfsizlik markazi” DUK ning mas'ul xodimlari o‘zlarining ma'ruzalari bilan qatnashdi.  

Tadbirda, shuningdek, Moliya va iqtisodiyot vazirligi, Markaziy bank hamda davlat ulushi mavjud bo‘lgan 9 ta bank (jumladan, “O‘zmilliy bank”, “O‘zSanoatqurilishbank”, “Aloqabank”, “Mikrokreditbank”, “Agrobank”, “Asakabank” va “Biznesni rivojlantirish banki”)ning axborot va kiberxavfsizlik bo‘yicha mutaxassislari ham ishtirok etdi.

Ma'ruzalarda kiberxavfsizlikni ta'minlashda milliy va xalqaro talablar, raqamli transformasiya jarayonida axborot xavfsizligining asosiy yo‘nalishlari, banklarga xos APT (Advanced Persistent Threat) hujumlari va ulardan himoyalanish strategiyalari hamda raqamli to‘lovlar va mobil bank xizmatlarida kiberxavfsizlikni ta'minlash bo‘yicha ma'lumotlar berildi. 

Tadbir ishtirokchilari interaktiv formatda o‘zlarini qiziqtirgan savollarga javoblar oldilar.