Мазкур сессия Ўзбекистон Республикаси Президентининг давлат аудити ва молиявий назорат тизимини такомиллаштиришга оид фармон ва топшириқлари ижроси доирасида ташкил этилган бўлиб, у давлат аудит соҳасида сунъий интеллект ва рақамли технологияларни жорий этиш бўйича халқаро тажриба алмашишга қаратилган.

Биринчи параллел сессия “Иқтисодиётимиз драйвери – ‘5 миллион сунъий интеллект етакчилари’ дастурининг амалдаги ижроси” мавзусига бағишланди. Сессия доирасида сунъий интеллектни таълим тизимига интеграция қилиш, ёш мутахассислар салоҳиятини ошириш ҳамда стартап лойиҳаларни ривожлантириш масалалари муҳокама қилинди.

Сессия ишида Ҳисоб палатаси раҳбарияти вакиллари, Рақамли технологиялар вазирлиги, Олий таълим, фан ва инновациялар вазирлиги, Ёшлар ишлари агентлиги масъуллари ҳамда АЗОСАИ ва ИНТОСАИ халқаро ташкилотлари вакиллари иштирок этди. Шунингдек, АЗОСАИга аъзо давлатларнинг олий аудит органлари ёш аудиторлари ҳам фаол қатнашди.

Муҳокамалар давомида давлат аудити соҳасида рақамли трансформациянинг амалий жиҳатлари, сунъий интеллект технологияларидан самарали фойдаланиш, Big Data таҳлили асосида қарор қабул қилиш тизимини такомиллаштириш масалаларига алоҳида эътибор қаратилди.

Сессия якунида иштирокчилар томонидан билдирилган таклиф ва ташаббуслар халқаро ҳамкорликни янада мустаҳкамлаш, шунингдек, ёш аудиторларнинг рақамли таҳлил кўникмаларини ривожлантиришга хизмат қилиши таъкидланди.