Иқтисодий ўқиш Ҳисоб палатаси раисининг бириничи ўринбосари М.Абдуллаев раҳбарлигида ўтказилиб, унда раис ўринбосари С.Мирзаев томонидан Президент Мурожаатномасида белгилаб берилган асосий йўналишлар, жорий йилда эришилган муҳим ижтимоий-иқтисодий натижалар ҳамда 2026 йил учун белгиланган стратегик вазифалар юзасидан атрофлича ахборот берилди.

Таъкидланганидек, давлатимиз раҳбари Мурожаатномасида иқтисодиётни технологик ва инновацион ривожлантириш, камбағалликни қисқартириш, аҳоли даромадларини ошириш, маҳалла тизимини янада мустаҳкамлаш, “яшил” иқтисодиёт ва экологик барқарорликни таъминлаш, шунингдек, давлат бошқаруви ва суд-ҳуқуқ тизимини тубдан ислоҳ қилишга қаратилган аниқ вазифалар белгилаб берилди.

Шунингдек, ўрганишда барча идораларда комплаенс ва коррупцияга қарши ички назоратга масъул ўринбосар лавозими жорий этилиши, Ҳисоб палатасининг вакили фаолияти йўлга қўйилиши ҳамда Давлатнинг ҳар бир сўм маблағи, ресурси бўйича шахсий жавобгарлик кучайтирилиши каби ислоҳотлар юзасидан амалга ошириладиган ишлар концептуал ўрганилди.

Иқтисодий ўқиш давомида Ҳисоб палатаси раисининг биринчи ўринбосари М.Абдуллаев Президент Мурожаатномаси халқимиз турмуш тарзи фаровонлигини оширишда, аҳоли учун муносиб ҳаёт шароитларини яратишда ҳамда мамлакатни барқарор ривожлантиришда муҳим аҳамият касб этишини алоҳида таъкидлади ҳамда Ҳисоб палатаси ходимларига белгиланган устувор вазифалардан келиб чиқиб, давлат маблағлари ва ресурсларидан самарали, мақсадли ва оқилона фойдаланиш устидан назоратни янада кучайтириш, шаффофлик ва қонун устуворлигини таъминлаш масалалари юзасидан тегишли эслатмалар берди.

Мазкур иқтисодий ўқиш Ҳисоб палатаси жамоаси учун Президент Мурожаатномасида белгиланган вазифаларнинг мазмун-моҳиятини янада чуқур англаш, уларни амалга оширишда идоранинг ўрни ва масъулиятини оширишга хизмат қилди.