Унинг доирасида МДҲ давлатлари Олий аудит органлари раҳбарлари Кенгашининг навбатдаги йиғилиши бўлиб ўтди. Тадбирда Арманистон, Беларусь, Озарбайжон, Қозоғистон, Қирғизистон, Тожикистон, Россия Федерацияси ҳамда Ўзбекистон Республикаси Олий аудит органлари раҳбарлари иштирок этди. 

Ушбу Кенгаш 2000 йилдан бери мавжуд бўлиб, у 2 йилда бир маротаба МДҲ давлатлари Олий аудит органлари иштирокида давлат аудити мавзусига бағишланган муҳокамалар ташкил этади.

2025 йилги Кенгаш йиғилишининг мавзуси – “Давлат аудити жараёнларида рақамли трансформация: рисклар, имкониятлар ва инновацион ёндашувлар”.

Ушбу мавзуни танлаш тасодифий эмас. Рақамли давлат аудити механизмларини жорий этиш бугунги кунда давлат молиясини самарали бошқаришнинг пойдевори ҳисобланади.

Йиғилишда МДҲ давлатлари Олий аудит органлари ўртасидаги ҳамкорликни янада кучайтириш, рақамлаштириш соҳасида тажриба алмашинувини тизимлаштириш, замонавий аудит усулларини жорий этиш бўйича келишувларга эришилди. 

МДҲга аъзо давлатлар Олий аудит органлари учун давлат аудити стандартларини ишлаб чиқиш бўйича ишчи гуруҳнинг фаолияти тўғрисида ҳисобот тақдим этилди. Ушбу Ишчи гуруҳ томонидан тасдиқланган услубий ҳужжатларни тасдиқлаш маросими ҳам бўлиб ўтди.

Бу йилги йиғилишда МДҲ давлатлари Олий аудит органлари раҳбарларининг Кенгашига 2025-2027 йилларда раислик қилиш ваколати расман Ўзбекистон Республикаси Ҳисоб палатасига ўтди.

Тадбирда Ўзбекистон Республикаси Ҳисоб палатаси раисининг биринчи ўринбосари М. Абдуллаев глобал миқёсда рақамли аудит тизимини ривожлантириш тенденцияларига урғу бериб, Ўзбекистонда ахборот технологиялари ва рақамлаштириш соҳасидаги трансформациялар ҳақида ахборот берди. 

Ўзбекистон Республикаси Ҳисоб палатасининг “Масофавий аудит маркази” фаолияти бўйича маълумот берилди. Хусусан, катта маълумотлар орқали риск таҳлилларини автоматлаштириш ва аудит қарорини қабул қилишда сунъий интеллект алгоритмларидан фойдаланиш бўйича амалий натижалар тақдим этилди.

Тадбир якунида иштирокчилар томонидан Резолюция ва Қарор қабул қилинди. Иштирокчи давлатлар аудит фаолиятини амалга оширишда замонавий рақамли технологиялар ва маълумотларни таҳлил қилиш усулларининг муҳим ролини таъкидладилар. Улар юқори сифатли ва кенг қамровли маълумотларга асосланган рақамли аудитнинг инновацион ёндашувларини ишлаб чиқишни ўз олдига мақсад қилиб олдилар.

Сунъий интеллект технологияларидан фойдаланиш, аудит ва эксперт таҳлили фаолияти давомида таҳлил кўлами ва чуқурлигини ошириш бўйича ишлар давом эттирилади.

Томонлар аудит объектларининг маълумотлар базаларига киришни кенгайтириш орқали масофавий аудитдан фойдаланишни рағбатлантиришни қайд этдилар.

2026 йилнинг куз ойларида Самарқанд шаҳрида “Давлат аудити жараёнларини рақамлаштириш ва сунъий интелектдан фойдаланиш” мавзусида кўп томонлама илмий-амалий конференция ўтказишга келишилди.

Ушбу Кенгаш йиғилиши МДҲга аъзо давлатлар Олий аудит органлари ўртасидаги мулоқотни янги босқичга олиб чиқди.