Маълумот учун: Тижорат банкларининг активлари 2025 йилнинг 1 август ҳолатига 852,4 трлн сўмни ташкил қилиб, 553,1 трлн сўми (65%) давлат улуши мавжуд 9 та банкларга ҳамда 299,2 трлн сўми (35%) бошқа банкларга тўғри келади. Тижорат банкларининг кредит портфели 576,2 трлн сўмни ташкил қилиб, шундан 392,5 трлн сўм қисми (68%) давлат улуши мавжуд банкларга тўғри келади. Жорий йилнинг ўтган 7 ойи мобайнида Банкларнинг активлари 83,1 трлн сўмга (+10,8%), кредит портфели 43,1 трлн сўмга (+8%) ошган.

Аудит давомида банклар томонидан муаммоли кредитларни ундиришда айрим камчиликларга йўл қўйилганлиги аниқланди. Масалан:

– Давлат улуши мавжуд банкларда муаммоли кредитлар жорий йилнинг 7 ойи мобайнида Ўзсаноатқурилишбанкда, Микрокредитбанкда, Миллийбанкда, Алоқабанкда ҳамда Асакабанкда ошган;

– жорий йилнинг 1 август ҳолатига давлат улуши мавжуд банклар кредит портфелида муаммоли кредитларнинг энг юқори улуши Микрокредитбанкда 6,5 фоизни, Бизнесни ривожлантириш банкида 6,1 фоизни ва Асакабанкда 4,8 фоизни ташкил қилган;

– муаммоли кредитларнинг бир қисми сўндирилмаган ҳолда, банк харажати ҳисобига балансдан ташқари ҳисобварақларга олиб ўтиш орқали салмоғи қисқартирилган;

– жорий йилнинг 1 август ҳолатига 6 та давлат улуши мавжуд тижорат банклари томонидан кредитлар бўйича эҳтимолий йўқотишларни қоплаш учун етарли захиралар шакллантирилмаган;

– манфаатлар тўйнашувига йўл қўйиш ҳолатлари мавжуд бўлиб, банк ходимларига алоқадор шахсларга тегишли кредитлар бўйича муддати ўтган қарздорликлар юзага келган;

– қарз олувчининг иш жойи ва даромад манбаи мавжуд бўлса-да, муаммоли ёки балансдан ташқари кредитларини ундириш борасида етарли ишлар ташкил қилинмаган.

Аудит натижаларидан келиб чиқиб, муаммоли кредитларни қисқартиришда банклар фаолияти самарадорлигини янада ошириш юзасидан Ҳисоб палатасининг тегишли тавсиялари тақдим қилинди.