Тадбирнинг очилишида Сув хўжалиги вазири ўринбосари З. Ишпўлатов сўзга чиқиб, Давлатимиз раҳбари бошчилигида ушбу тизимда кенг кўламли ислоҳотлар амалга оширилаётганлиги, хусусан, иқтисодиёт тармоқлари ва аҳолининг суғориш сувига бўлган талабини қондириш, мавжуд ресурслардан оқилона ва самарали фойдаланишни таъминлаш ва соҳа бошқарувини рақамлаштиришга алоҳида эътибор қаратилаётганлигини таъкидлади.

Ҳисоб палатасининг ташаббуси ва иштирокида ташкил қилинган “Ситуацион марказ”да сув ва энергия ресурслари ҳисоби ҳамда сув хўжалиги соҳасига ажратилган маблағлардан тўғри ва мақсадли фойдаланиш боғлиқ жараёнларнинг мониторинги юритилади. Бунинг учун “Uzinfocom” корхонаси билан ҳамкорликда сув хўжалиги соҳасига оид мавжуд дастурий таъминотларнинг техник ҳолати яхшиланиб, уларни янада такомиллаштириш ишлари амалга оширилди.

Соҳада мавжуд барча дастурий таъминотлар маълумотларини йиғиш, умумлаштириш ва таҳлил қилиш имконини берувчи “Рақамли сув хўжалиги” ягона платформаси ишлаб чиқилди.

Натижада сув хўжалиги масалалари бўйича кунлик, оператив (тезкор) маълумотларни олиш имконияти янада оширилди. Республикада мавжуд 630 мингдан ортиқ сув истеъмолчилари кесимида сув олиш лимитларини белгилаш, уларни туман Халқ депутатлари кенгаши билан келиш жараёнлари тўлиқ электрон кўринишга ўтказилди. 

Бундан ташқари, “Ҳудудий электр тармоқлари” АЖ томонидан насос станцияларда ўрнатилган 8 мингдан зиёд электр ҳисоблагичлар маълумотлари “Насос станциялари” ахборот тизимига боғланиб, сарфланаётган электр энергия ресурсларини электрон ҳисобини юритиш имконияти яратилди. 

Ерларнинг мелиоратив ҳолатини мониторингини юритиш, сув хўжалиги объектларининг техник ҳолатини назорат қилиш ҳамда сув кадастри ва сув балансларини юритиш тизими такомиллаштирилди. Сув хўжалиги жараёнларини бир жойдан кузатиш ва бошқариш тизими йўлга қўйилди.

Ахборот тизимлари ёрдамида сув хўжалиги объектларида ўрнатилган 30 мингдан ортиқ рақамли қурилмалар маълумотларини кузатиш имкониятлари яхшиланди. Натижада сувни ўлчаш ва бошқариш жараёнларида 20 фоизгача сувнинг техник йўқолишлари олди олинмоқда.