Стратегияда устав капиталида давлат улуши 50 фоиз ва ундан ортиқ бўлган корхоналар фаолиятини такомиллаштиришга қаратилган 160 та топшириқ ва мақсадли кўрсаткичлар белгиланган.

Аудит давомида 124 та (78 %) топшириқ ижроси таъминлангани, 10 таси (6 %) давом этаётгани маълум бўлди.

Стратегияда белгиланган вазифалар ва мақсадли кўрсаткичлар бажарилиши оқибатида қуйидаги ижобий натижаларга эришилган:

– Давлат мулкини бошқариш ва хусусийлаштириш соҳасидаги 40 та қонунчилик ҳужжатлари такомиллаштирилган, 32 та норматив-ҳуқуқий ҳужжат қабул қилинган; 

– фаолият кўрсатмаётган, зарар кўриб ишлаётган ва паст рентабелли 736 та давлат иштирокидаги корхоналар тугатилган;  

– Давлат иштирокидаги корхоналар сони 67 фоизга қисқартирилган;

– корхоналар фаолиятининг молиявий кўрсаткичлари яхшиланган;

– фаолият хусусиятларидан келиб чиққан ҳолда замонавий корпоратив бошқарув тизими элементлари амалиётга татбиқ этилган.

Шунингдек, қонунчилик базаси ва мониторинг тизими мавжуд эмаслиги ҳамда амалий чоралар кўрилмагани сабабли 26 та (16 %) топшириқ ижроси ўз муддатида таъминланмаган.

Ҳисоб палатаси томонидан аудит натижалари бўйича Стратегияда белгиланган мақсадларга эришишни таъминлаш юзасидан таклиф ва тавсиялар ишлаб чиқилиб, Вазирлар Маҳкамасига тақдим этилди.