Мазкур масала юзасидан, 12 сентябь куни Ҳисоб палатасида Тошкент давлат иқтисодиёт университети (ТДИУ)да давлат молиявий назорати ва аудити йўналишида малакали кадрларни етиштириш тизимини йўлга қўйиш масалалари муҳокама қилинди.

Муҳокамада Ҳисоб палатаси раиси ўринбосари С. Мирзаев ва тегишли тузилмалар раҳбарлари, шунингдек, Олий таълим, фан ва инновациялар вазирлиги, Иқтисодиёт ва молия вазирлиги, ТДИУ, Аудиторлар палатаси, “Катта тўртлик”ка кирувчи KPMG ва Ernst&Young аудиторлик компаниялари вакиллари иштирок этди.

Учрашув давомида ТДИУда давлат аудити йўналишини ташкил этиш бўйича норматив ҳужжат лойиҳасига мутахассислар томонидан миллий ва халқаро тажрибалардан келиб чиқиб, таклифлар илгари сурилди. 

Ушбу тизимнинг асосий мақсади – иқтидорли ёшларни давлат молиявий назорати ва аудити соҳасига мақсадли йўналтириш, таълимни халқаро стандартлар ва таълим дастурлари асосида олиб бориш, мазкур соҳада таълим ва илмий-тадқиқот ишларини сифатли ташкил этишда манфаатдор ташкилотлар (кадрлар буюртмачилари) ҳамкорлигини таъминлаш.

Шу билан бирга, Университетнинг ўқитиш жараёнларини ва моддий техника базасини такомиллаштириш орқали соҳада чуқур назарий билим ҳамда амалий кўникмаларни ўзлаштириш муҳитини яратиш зарурлиги таъкидланди. 

Мутахассислар томонидан билдирилган барча таклифлар муҳокама қилинган ҳолда норматив ҳужжат лойиҳасини такомиллаштириш ва уни амалга ошириш чора-тадбирларини биргаликда ишлаб чиқишга келишилди.